Drejtuesi politik i koalicionit Euroatlantik, Lulzim Basha ka deklaruar se synim i këtij koalicioni është qeverisja e Shqipërisë.
Megjithatë, sesa mandate do të marrin në zgjedhjet paralamentare sipas Bashes është në dorë të qytetarëve.
“Sesa mandate do të votojnë qytetarët listën e hapur të koalicionit Euroatlantik kjo është në dorë të qytetarëve. Ne i kemi marrë të gjitha masat që mund të marrim në kushtet e një bllokade totale mediatike, të një bllokade totale të gjithanshme, të një sulmi të gjithanshëm nga garda e vjetëer politike, por ne kemi marrë të gjitha masat me kandidatët më të mirë me listën tonë të hapur dhe me programin tonë. Pas zgjedhjeve synimi ynë është që të qeverisim Shqipërinë prandaj jemi serioz në gjithçka që bëjmë e nuk jemi një parti proteste”, ka thënë ai në emisionin “ Këndi i Debatit” në Tëvë1.
Më tej ai ka përjashtuar mundësinë e bashkëpunimit pazgjedhur me Edi Ramen, me këdo të korruptuar, si dhe me ata që sipas tij nuk japin mbështetje njëqind për qind SPAK-ut.
“Ne nuk përjashtojmë bashkëpunimin politik në të mirë të Shqipërisë, por ne përjashtojmë kategorikisht bashkëpunimin me Edi Ramën, përjashtojmë kategorikisht bashkëpunimin me këdo të korruptuar, përjashtojmë kategorikisht bashkëpunimin me ata që nuk japin mbështetje 100 për qind SPAK-ut dhe ne përjashtojmë bashkëpunimin me këdo që nuk është qind për qind i lizuar me vlerat tona euroatlantike dhe partneritetin tonë strategjik me Shtetet e Bashkuara të Amerikës, Britaninë e Madhe dhe Bashkimin Evropian”, ka shtuar Basha./teve1.info/
