Me dhimbje shpjegoi se si u vra një fëmijë 2-vjeçar nga forcat serbe.
Edhe shumë rrëfime të tilla do t’i shihte dhe dëgjonte përgjatë luftës reporteri norvegjez, Paul Refsdal.
Refsdal gjatë gjithë kohës mbante kamerën në dorë për t’i dokumentuar krimet që po kryheshin në Kosovë.
Incizimet e tij tronditën botën perëndimore.
Tani pas 26 vitesh duke reflektuar për luftën reporteri norvegjez thotë se puna e gazetarëve ishte e rëndësishme sepse imazhet e luftës në Kosovë patën ndikim tek shtetet perëndimore.
“Po ne patëm ndikim sepse e treguam të vërtetën por nëse nuk do të kishte vullnet nga qeveritë perëndimore për të intervenuar atëherë nuk do të ndryshonte situata. Shtetet perëndimore ishin në dijeni se çfarë kishin bërë forcat serbe në Kroaci dhe në Bosnje andaj kishin një pamje më të qartë për luftën. Pra ngjarjet e kaluara ndikuan jashtëzakonisht shumë për të ndërhyrë në Kosovë. Natyrisht që puna e gazetarëve ishte e rëndësishme për ta informuar publikun e gjerë se çfarë po ndodhte realisht në Kosovë”, tha reporteri norvegjez.
Refsdal ka ndarë disa nga momentet më prekëse që ka përjetuar gjatë kohës sa e mbulonte luftën në Kosovë.
“Do ta kem gjithmonë në mendje solidaritetin e popullit shqiptar. Nëpër fshatrat e Kosovës mund të trokisnit në çdo derë dhe dikush do t’iu priste me mirësjellje dhe do t’iu ofronte ushqim apo vend për të qëndruar. Gjatë luftës kur unë u plagosa mjekët, infermierët dhe ushtarët e UÇK-së u kujdesen për mua. Me këta njerëz unë akoma ruaj kontakte të ngushta dhe takohem me ta kur vij në Kosovë”, tregoi Refsdal.
Refsdal ka komentuar edhe për luftërat e tjera po zhvillohen në botë. Ai thotë se pavarësisht raportimit të gazetarëve për krimet e kryera ndaj civilëve nëpër konflikte të ndryshme, bota perëndimore nuk tregon vullnet politik për intervenuar siç ndodhi Kosovën.
“Ju mund t’i shihni konfliktet e tjera siç është rasti me Gazën ku gazetarët i kanë mbuluar zhvillimet atje dhe Shtetet e Bashkuara të Amerikës nuk kanë ndërhyrë për motive politike. Pra është një shembull kur gazetarët edhe pse raportojnë për krimet nuk e ndryshojnë situatën në terren. Në Kosovë mediet perëndimore kishin simpati për civilët shqiptarë dhe antipati për serbët për shkak të asaj se çfarë bënë. Por, sa i përket luftës në Gaza mediet perëndimore kryesisht janë të rreshtuara me Izraelin”, tha ai.
Paul Refsdal ka kaluar më shumë se katër dekada duke mbuluar konfliktet në vende si Sri Lanka, Peruja, Çeçenia, e Afganistani.
Reporteri norvegjez arkivin e tij të luftës ia ka dorëzuar Institutit të Kosovës për krime lufte./teve1.info/
