Avdullah Beqiri është udhëtar që pret autobusin në rrugën “Ilir Konushevci” në Prishtinë.
Ky i moshuar çdo ditë udhëton më autobus në relacione të ndryshme të kryeqytetit.
Por, deri të vijë autobusi ai pret në këmbë, në mungesë të një pritoreje.
“Jashtëzakonisht është mungesë e madhe edhe është për tu çuditur pse nuk është këtu një pushimore, është e çuditshme”, thotë ai.
Beqiri ka edhe një kërkesë drejtuar Komunës.
“Kishim me kërkuar prej kryetarit edhe Komunës gjithqysh këtu me qenë një, bile edhe e madhe se jo veç pak a shumë”, thotë ai.
Edhe një pensionist tjetër ka të njëjtin hall sikurse Beqiri.
“Nuk jemi të kënaqur me këto pushimore që do i kanë bërë mirë e disa ende. Po na bien neve pensionisteve në këmbë për shembull 5 minuta po 10 po na po lodhemi shpejtë. Veç edhe këto pushimore, me kanë me i vendos edhe në disa vende që nuk ka aty në lagjen Kodra e Trimave andej nuk ka pushimore veç në këmbë duhet me prit. Nejse tani nuk është edhe problem por dimrit për shembull është më problem”, thotë Xhelil Rama.
Se pritore kishte këtu kohë më parë e tregon Nazmi Avdullahu.
“Vështirë boll na të moshuar, për çdo ditë ankohen se këtu ka qenë vendi e kanë heq. Nuk e di pse, nuk kushton ajo aq diçka mos me bo atë punë. Shumë se jo pak, je i lodhur i ke marrë harxh në dorë duhet me mbajt qetu, edhe këta autobusë nuk po vijnë me kohë”, thotë ai.
Por për qytetarin Bedri Gashi, mungesa e ulëseve nuk duket se është fort problem.
“Në këmbë s’kemi çka me bo kur nuk ka ulëse duhet me qëndrua në këmbë, nuk na bien me prit shumë. Trafiku është rregull boll por pse jemi plakë ne jemi moshu, duhet me qëndrua në këmbë kapak duhet. Me kanë me i bo ulëset është aq më mirë sidomos për të moshuarit që ka mundësi, që nuk ka mundësi rrijmë edhe në këmbë”, thotë Gashi.
Megjithatë, opozita në kryeqytet po e sheh si problem të madh mungesën e pritoreve.
“Paraqet një problem sidomos gjatë stinës së vjeshtës dhe dimrit për shkak të reshurave të borës edhe të shiut. Paraqet problem për qytetarët, banorët ata që i presin autobusët e shto faktin që nganjëherë vonohen autobusët në masë goxha të madhe deri në gjysmë orë. E qytetarët me qëndru me një pjesë pa pritore të autobusëve paraqet problem. Kështu që Komuna e Prishtinë, gjegjësisht Drejtoria e Shërbimeve Publike e ka për obligim vendosjen e pritoreve gjithë andej Prishtinës, sidomos në ato vende ku mungojnë siç është nëpër fshatra dhe në lagjen Kodra e Trimave edhe në lagje të ndryshme në kryeqytet”, thotë asamblisti i Vetëvendosjes, Besart Krasniqi.
E Komuna e Prishtinës për gjithë këtë situatë ka një arsyetim.
“Në shumë segmente të qytetit është duku u punuar, në shumë segmente do të ketë punime dhe ka planifikime në të cilat këto pritore mund të vendosen vetëm pasi të kryhen punimet e planifikuar. Në rrugën si “Ilir Konushefci”, që i referohemi si Xhamia e Llapit, ka planifikim për punime, e do të ketë punime, do të hapet rruga e do të ndërtohet pritorja do të hapet shiriti i dedikuar për autobus e taksi”, thotë Luftar Braha, këshilltar për digjitalizim në Komunën e Prishtinës.
Deri më tani janë vendosur 43 pritore të Tipit A, 6 të Tipit B, 25 të Tipic C.
E në proces e sipër janë 10 të tipit A dhe 6 të tipit B.
Tipi A dhe B dallojnë vetëm për nga madhësia, ndërsa tipi C është një shtyllë me një shenjë lajmëruese që është vendndalim për autobus.
