Për herën e dytë brenda javës, Endrit Nika u shfaq në gjykatore.
Beteja e tij me drejtësinë, nën akuzat pë vrasjen e argjentinases, Maria Clara Urdangaray, vazhdoi me dëgjimin e dy menaxherëve të hotelit ku ndodhi tragjedia.
Fehmi Zabeli, tha se është lajmëruar nga dikush tjetër për rastin dhe tregon se çfarë ka parë në vendin e ngjarjes.
“Kur kom zbritë poshtë, vajzën nuk e kom pa, i kom pa pjesëtarë të policisë, edhe disa xhama që nuk e disha as çka ka ndodhë”, tha ai.
Përmes videolidhjes, pjesë e seancës ishin edhe prindërit e viktimës.
Për rastin tragjik, më shumë detaje dha dëshmitari tjetër.
Mirlind Zeqiri, tregoi se çfarë kishte parë në kamerat e sigurisë në natën kritike.
“Në gjykatë dhe Prokurori jam pyetur për pjesën e korridorit. Aty e kam sqaru, i kam pa lëvizjet e Endritit, i cili ka lëvizë prej derës së dhomës deri te ashensori. Gjatë kohës sa i kemi tërheq incizimet, se a jemi duke i tërheq pjesën e duhur, më ka ra në sy lëvizjet e Endritit që i ka bërë nga dera e dhomës deri te ashensori”, tha Zeqiri.
Zeqiri tregon se si ishte një ditë më pas, dhoma e hotelit nga ku dyshohet se ka rënë viktima.
“Ditën kur kanë përfundu hetimet, në ora 10:00. Janë largu shiritat kur kanë përfundu hetimet. Kam parë xhamin e thyer, i kam parë dëmet se çka janë shkaktu, i kam pas disa mjete të thyera, dëmtime në shtrat, në mure”, tregoi dëshmitari.
Në shkurt të këtij viti, Endrit Nika u dënua me 18 vjet burgim për vrasjen e argjentinases, por që Gjykata e Apelit, e ktheu rastin në rigjykim.
