17 shkurti i vitit 2008 është ngjarja më kulmore në historinë e Kosovës.
Sot 17 vjet më parë, ish-kryeministri, Hashim Thaçi lexoi deklaratën e pavarësisë së Kosovës në një seancë të jashtëzakonshme.
Pas këtij akti që la gjurmë në histori, me mijëra qytetarë dolën në rrugë për të festuar ditën që e pritën gjatë.
Nën emocione të shumta, shqiptarët kujtuan miqtë më të mirë të Kosovës që ndihmuan në çlirimin e vendit.
E në Serbi shpërthyen protestat, madje u sulmua edhe ambasada e Shteteve të Bashkuara të Amerikës.
Por sot kur shqiptarët festojnë në liri, ish kryeministri Thaçi me Kadri Veselit, Jakup Krasniqin dhe Rexhep Selimin po mbahen në paraburgim në Hagë duke u gjykuar për krime lufte.
Por, pavarësisht faktit që Thaçi nuk ndodhet në Kosovë për të festuar këtë ditë, ai shihet i lumtur në një foto të publikuar nga djali i Haxhi Shalës, Flakroni.
Në raste festash gjithë ish krerët e UÇK-së që po mbahen në paraburgim në Hagë bëhen bashkë.
“Të paraburgosurve u ofrohet mundësia të kalojnë kohë së bashku dhe të festojnë festa dhe raste të veçanta në përputhje me rregullat dhe rregulloret e institucionit të paraburgimit”.
Për diplomatin amerikan, Richard Grenell, ky moment historik i Kosovës është lënë në hije nga një padrejtësi e madhe.
“Ati themeltar i shtetësisë së Kosovës, Hashim Thaçi, do të duhej të festonte sot në Prishtinë, jo prapa hekurave në Hagë”, ka deklaruar ai.
Deklaratën e emisarit amerikan e komentoi edhe kryeministri i Shqipërisë, Edi Rama.
“Sa më shumë të vazhdojë, aq më e madhe është njolla në organin ndërkombëtar të drejtësisë” – deklaroi Rama.
SHBA-ja e njohu pavarësinë e Kosovës një ditë pas shpalljes së saj. Po atë ditë, shteti më i ri u njoh edhe nga Shqipëria, Franca, Mbretëria e Bashkuar, Turqia si dhe shtete të tjera.
