Ka nisur numërimi i votave për kandidatët për deputetë në qendra komunale të numërimit në Prishtinë, Lipjan, Obiliq dhe Partesh.
Zëdhënësi i Komisionit Qendror të Zgjedhjeve, Valmir Elezi, ka bërë të ditur se sot po bëhen përgatitjet dhe numërimi pritet të nisë nesër për komunat tjera.
“Po fillojmë me procesin e numërimit të votave për kandidatët për deputetë, të cilat janë nga vendvotimet e rregullta në 2533 vendvotime në të gjithë Kosovën. Fillimisht, procesi i numërimit në qendrat komunale të numërimit do të nisë në Prishtinë, Obiliq, Lipjan dhe Partesh. Në komunat e tjera do të nisë pasi të bëhen të gjitha përgatitjet e duhura teknike dhe administrative. Pritet të nisë nesër”, ka thënë Elezi në konferencë për media.
Sa i përket numërimit të votave me kusht, të personave me nevoja të veçanta dhe diasporës, zëdhënësi i KQZ-së ka thënë se do të bëhet në një fazë mëvonshme në Qendrën e Numërimit dhe Rezultateve pasi të përfundojë numërimi në qendrat komunale të numërimit./teve1.info/
