Këshilli Kombëtar Shqiptar e ka cilësuar akt të hapur armiqësor ndaj shqiptarëve dy vendimet e Ministrisë për të Drejtat e Njeriut dhe Dialogun Social të Serbisë për shfuqizimin e vendimit për subvencionet e fermerëve shqiptarë, të financuara nga Fondi i Qeverisë së Kosovës dhe refuzimin e regjistrimit të kryetarit të ri të Këshillit Kombëtar Shqiptar, Enkel Rexhepi.
Sipas këtij këshilli vendimet janë diskriminuese.
“Këto akte janë shembuj të qartë të politikave diskriminuese të shtetit serb ndaj shqiptarëve, të cilët vazhdojnë të përballen me shtypje politike, izolim ekonomik dhe përjashtim nga vendimmarrja institucionale”, thuhet në reagim.
Sipas Këshillit Kombëtar Shqiptar vendimi për shfuqizimin e subvencioneve nga Qeveria e Kosovës është i paligjshëm.
“Ky vendim përbën një akt bllokade të qëllimshme ekonomike, duke dëshmuar qartë qëllimin e Serbisë për të penguar zhvillimin e shqiptarëve në çdo mënyrë të mundshme. Serbia nuk ofron ndihmë për Luginën e Preshevës dhe, njëkohësisht, ndalon çdo përpjekje për mbështetje nga Kosova, duke krijuar një rreth vicioz varfërie dhe izolimi”, thuhet tutje.
Poashtu thuhet se pretendimi se kandidatura për kryetar nuk u dorëzua brenda afatit të parashikuar është një alibi e pastër politike, e përdorur për të paralizuar funksionimin e Këshillit.
“Ky veprim synon të krijojë një ngërç institucional, duke i mohuar shqiptarëve të drejtën për të udhëhequr dhe përfaqësuar veten në një organ që supozohet të jetë autonom. Kjo qasje e hapur diskriminuese dëshmon se Serbia nuk e ka qëllim respektimin e të drejtave të pakicave, por synon të kontrollojë dhe dobësojë çdo institucion shqiptar që përpiqet të funksionojë në përputhje me ligjin dhe të mbrojë të drejtat e komunitetit të tij”, thuhet nga Këshilli Kombëtar Shqiptar.
Qeveria ndan mbi 1 milion euro për shqiptarët e Luginës së Preshevës që merren me bujqësi
