Kolumbia ka rënë dakord me të gjitha kushtet e vendosura nga Presidenti Donald Trump për kthimin e emigrantëve të paligjshëm kolumbianë nga SHBA pas një mosmarrveshjeje të mëparshme, deklaroi Shtëpia e Bardhë të dielën.
“Qeveria e Kolumbisë ka rënë dakord me të gjitha kushtet e Presidentit Trump, duke përfshirë pranimin e pakufizuar të të gjithë të huajve të paligjshëm nga Kolumbia të kthyer nga Shtetet e Bashkuara, përfshirë në avionët ushtarakë amerikanë, pa kufizim apo vonesë”, thuhet në një deklaratë.
“Bazuar në këtë marrëveshje, tarifat dhe sanksionet e hartuara plotësisht IEEPA (Akti i Fuqive Ekonomike të Emergjencës Ndërkombëtare) do të mbahen në rezervë dhe nuk do të nënshkruhen, përveç nëse Kolumbia nuk e respekton këtë marrëveshje”, thuhet në deklaratë.
Deklarata gjithashtu tha se sanksionet e vizave të lëshuara nga Departamenti i Shtetit dhe inspektimet e zgjeruara nga Doganat dhe Mbrojtja e Kufirit do të mbeten në fuqi deri në kthimin me sukses të aeroplanit të parë të të dëbuarve kolumbianë, raporton AA.
“Ngjarjet e sotme i bëjnë të qartë botës se Amerika është e respektuar përsëri. Presidenti Trump do të vazhdojë të mbrojë ashpër sovranitetin e kombit tonë dhe ai pret që të gjitha kombet e tjera të botës të bashkëpunojnë plotësisht në pranimin e dëbimit të qytetarëve të tyre të pranishëm ilegalisht në Shtetet e Bashkuara. ”, thuhet në deklaratë.
Presidenti kolumbian Gustavo Petro u zotua më herët të përgjigjet pasi Trump njoftoi “masa hakmarrëse urgjente dhe vendimtare” kundër vendit të tij.
Masat e vendosura nga Trump përfshijnë tarifa 25% për të gjitha mallrat kolumbiane që vijnë në SHBA, të cilat do të rriteshin në 50% brenda një jave, një ndalim udhëtimi dhe sanksione vizash për anëtarët dhe mbështetësit e qeverisë kolumbiane si dhe vendosje të sanksioneve financiare emergjente.
Kolumbia është furnizuesi i katërt më i madh i SHBA-së jashtë shtetit i naftës bruto, duke transportuar rreth 209,000 fuçi naftë në ditë vitin e kaluar, megjithëse rritja e prodhimit vendas ka reduktuar varësinë e SHBA-së nga nafta e huaj. Vendi i Amerikës së Jugut është gjithashtu furnizuesi më i madh në SHBA i luleve të prera të freskëta.
