Kryetari i Pejës, Gazmend Muhaxheri ka reaguar pas aksidentit të së dielës në Skenderaj ku tre persona humbën jetën e pesë të tjerë u lënduan.
Muhaxheri ka thënë se në këtë aksident kanë humbur jetën tre anëtarë të familjes Gashi nga Peja.
Ai po ashtu ka thënë se kjo është një humbje e madhe për Pejën, si dhe një moment pikëllimi për të gjithë.
“Me dhimbje të thellë morëm lajmin tragjik për aksidentin e rëndë që ndodhi në Çubrel të Skenderajt, ku humbën jetën tre anëtarë të familjes Gashi nga Peja. Kjo është një humbje e madhe për qytetin tonë dhe një moment pikëllimi të thellë për të gjithë ne. Në këto çaste të vështira, i shprehi ngushëllimet më të sinqerta familjes Gashi, të afërmve dhe miqve të tyre. Peja dhe gjithë qytetarët e saj janë pranë jush në këto momente të rënda”, ka shkruar Muhaxheri në Facebook.
Tre persona kanë vdekur e pesë të tjerë janë lënduar si pasojë e aksidentit që ndodhi mbrëmjen e së dielës në rrugën rajonale Mitrovicë-Pejë, saktësisht në segmentin rrugor në fshatin Çubrel të Skenderajt.
Sipas Policisë dy vetura u përfshin në aksident njëra prej të cilave ishte veturë zyrtare e Policisë./teve1.info/
