Para disa javësh mori njërën nga pozitat më të rëndësishme në administratën e presidentit të 47-të të Shteteve të Bashkuara të Amerikës, Donald Trump.
Por emisari presidencial për misione të Posaçme, Richard Grenell gjeti kohë të merret edhe me Kosovën.
Grenell të mërkurën reagoi ndaj deklaratës së kryeparlamentarit, Glauk Konjufca për televizionin publik se nga viti 2011, administrata e Obamës dhe Biden e kanë vendosur në disfavor Kosovën në raport me Serbinë.
Për këtë, Grenell pati një pyetje.
“Ata kaluan 4 vitet e fundit duke komplimentuar Joe Biden dhe duke marrë pjesë në konventat dhe festat e tij. Pse nuk u ankuan kurrë më parë?”, u shpreh Grenell.
Mirëpo kundërpërgjigje për këtë pyetje nuk pati nga Lëvizja Vetëvendosje.
Pa përgjigje gjatë së enjtes ishin edhe nga Qeveria e Kosovës.
Ish- ambasadori i Kosovës në Itali, Albert Prenkaj, thotë se nuk ka rëndësi se cila administratë është, sipas tij, SHBA-ja gjithmonë ka qenë krah Kosovës.
Mirëpo,Prenkaj thotë se deklarata ka qenë më shumë një arsyetim prej kryeparlamentarit.
Për të, fërkimet politike të Grenellit me krerët shtetërorë të Kosovës janë të vjetra, nga koha e administratës së parë të Trump-it.
Në administratën e parë të Trumpit, Richard Grenell shërbente si i dërguar i special për dialogun Kosovë – Serbi.
Edhe atëherë ai ka pasur deklarata kundër liderit të Vetëvendosjes duke thënë se Albin Kurti ka qenë kundër secilës administratë dhe rrjedhimisht kundër Amerikës.
