Sulmuesi i Kosovës, Vedat Muriqi i ka dhënë fund spekulimeve për të ardhmen e tij, duke bërë me dije se nuk e ka ndërmend të largohet nga Mallorca gjatë këtij muaji.
Javët e fundit, emri i Muriqit është përfolur shumë pasi ka qenë i lidhur me një rikthim të mundshëm te skuadra e Fenerbahçes.
Madje, është raportuar se Fenerbahçe ka ofruar 10 milionë euro për kartonin e Muriqit, pasi sulmuesi kosovar pëlqehet nga trajneri Jose Mourinho.
Megjithatë, Muriqi ka konfirmuar se nuk do të largohet nga Mallorca, të paktën deri në fund të këtij sezoni.
Sipas Muriqit, Mallorca nuk dëshiron që ta shesë dhe për këtë arsye është e mbyllur për të gjitha ofertat për 30-vjeçarin.
“Në Turqi më njohin mua, menaxherët dhe trajnerët e klubit e dinë se çfarë sjell në çdo ekip. Prandaj them se ka diçka të çuditshme për transferimet në janar apo verë, jo vetëm në Turqi, por në përgjithësi. Mallorca është e mbyllur për çdo ofertë për këtë çështje. Ata nuk duan të dëgjojnë asnjë ofertë, as me gojë e as me shkrim. Kjo ndodhi edhe tani. Prandaj nuk e shoh të mundur që të largohem deri në afatin kalimtar të verës, jam i lumtur”, ka thënë Muriqi.
Muriqi ka kontratë me Mallorcan deri në vitin 2027, ndërsa këtë sezon ka realizuar 3 gola dhe ka bërë 2 asistime në 14 ndeshje të luajtura në La Liga.
