Dyfishim të pagave në sektorin publik, si dhe të pensioneve baraz me pagën minimale në vlerë prej 500 euro ka premtuar kryetari i AAK-së, Ramush Haradinaj në një takim me përfaqësuesit e Sindikatës së Pavarur të Administratës së Kosovës.
Haradinaj ka thënë se Aleanca do të rikthej dialogun social qeveri – sindikatë dhe Kontratën Kolektive, do ta amandamentojnë Ligjin për organizmin sindikal, si dhe do të bëjnë implementimin e ligjit për pensionistët kontributdhënës për të punësuarit pas luftës së vitit 1998-99.
Sipas tij plani i tyre është garancë për të rikthyer dinjitetin e punës, për të ndaluar largimin e kuadrove profesionale nga vendi si dhe për të ndërtuar një Kosovë që ofron shpresë për të gjithë.
“Bisedë e sinqertë me përfaqësuesit e Sindikatës së Pavarur të Administratës së Kosovës, të cilëve i prezantova ofertën tonë për Kosovën fituese. Ka vetëm një zgjidhje: Dyfishim i pagave në sektorin publik, si dhe të pensioneve baraz me pagën minimale në vlerë prej 500 euro. Ky është zotim i yni të cilin do ta bëjmë realitet që në ditët e para gjatë mandatit qeverisës. Programi ynë ofron zgjidhje konkrete dhe të realizueshme. Do të rikthejmë dialogun social qeveri – sindikatë dhe Kontratën Kolektive, do ta amandamentojmë Ligjin për organizmin sindikal në mënyrë që sindikatave t’i fuqizojme rolin e tyre në ndërtimin e politikave qeverisëse, do të bëhet implementimi i ligjit për pensionistët kontributdhënës për të punësuarit pas luftës së vitit 1998-99. Plani ynë për Kosovën Fituese është garancë për të rikthyer dinjitetin e punës, për të ndaluar largimin e kuadrove profesionale nga vendi dhe për të ndërtuar një Kosovë që ofron shpresë për të gjithë. Kosova Fituese është projekti që i duhet vendit tonë sot”, ka shkruar Haradinaj në Facebook./teve1.info/
