47 mësimdhënës dështuan të kalojnë testimin për licencë të avancuar.
Licencë kjo e cila do të mundësojë zhvillim në karrierë e pagë me të lartë.
Ani pse nga Ministrja e Arsimit e paraqiti si një sukses, vetëm 7 prej 54 mësimdhënësve arritën që ta kalojnë atë.
“Për herë të parë javën e kaluar e përmbyllëm me sukses provimin për licensën e avancuar të cilit iu nënshtruan gjithsej 54 kandidatë. Ky është një sukses i jashtëzakonshëm në fushën e arsimit. Qëllimi i sistemit të licencimit është zhvillimi i vazhdueshëm profesional dhe avancimi në karrierë i mësimdhënësve përmes vlerësimit të performancës së tyre”, ka thënë ministrja e Arsimit, Arbërie Nagavci.
Mos-avancimin e 47 mësuesve, Sindikata e Bashkuar e Arsimit nuk e quan dështim.
Por sipas kryetarit të kësaj sindikate Rrahman Jashari, ky test nuk ishte shumë transparent.
“Nuk ka pasur transparence nuk ka pasur fillimisht bashkëbisede me mësimdhënësit dhe nuk duhet të kuptuar në opinion siç i quajnë ngelça. Nga 54 mësimdhënës 7 shihet se janë me të mirë se te tjerët, pra këtë qëllim e ka avancimi. Të nxjerri më të mirët prej të mirëve, pra nuk është që ka ngelecana këtu por nga ai 54 , 7 janë dalluar nga të tjerët”, tha kreu i SBASHK-ut, Rrahman Jashari.
Kurse eksperti i arsimit, Ismet Potera, kërkon të bëhet një analizë për këtë numër të vogël të mësuesve që kaluan këtë testim.
“Nuk dua të i paragjykojë as mësimdhënësit as kurgjo, pasi e para nuk i kam parë testet të cilat iu kanë nënshtrua mësimdhënësit por megjithatë duhet të bëhet një analizë pse ky rezultat kështu. A kanë qenë çështje testit a ka qenë ajo ngarkesa psikologjike e tyre për herë të parë që po hijnë në test”, shprehet Potera.
Kurse njohësi i arsimit, Argjend Osmani, ka kritika në mënyrën e formulimit të testimit.
“Ajo çka më bëri përshtypje është mënyra shpejt e shpejt e organizimit të këtij testimi që është bërë pak para zgjedhjeve, duke pasur parasysh që Ministria në vazhdimësi ka dështuar të krijojë një testim efektiv gjatë këtyre viteve”, thotë Osmani.
Mësimdhënësit e gjuhës shqipe, matematikës si dhe ata të ciklit fillore ishin ata të cilët patën mundësinë të nënshtrohen këtij testimi për avancim në karrierë.
