Pretendimet për keqpërdorim dhe konflikt interesi në ndarjen e granteve nga Ministria e Bujqësisë, do të qartësohen gjatë këtyre ditëve, deri në fund të dhjetorit.
Kështu bëjnë të ditur nga Agjencia për Parandalimin e Korrupsionit (APK). Pas presionit publik, ministria e Bujqësisë e udhëhequr nga ministri Faton Peci ka pezulluar përkohësisht grantet për vëllain e deputetes të Lëvizjes Vetëvendosje, Fitore Pacolli dhe këshilltarit e ministrit në fjalë, Naim Huruglica më 22 nëntor 2024 deri në një vendim të APK-së.
Drejtori i APK-së, Yll Buleshkaj në një intervistë për KosovaPress thotë se është në proces rasti ku vetë Ministria e Bujqësisë ka kërkuar që pretendimet publike për konflikt interesi dhe parregullsi të trajtohen nga kjo agjenci.
“Kemi raste kur ministra të caktuar kanë kërkuar që pretendimet publike për konflikt interesi dhe parregullsi të trajtohen nga agjencia. Një rast të tillë, e kemi edhe në rastin e fundit i cili është përfolur mjaft shumë për ndarjen e granteve nga Ministria e Bujqësisë përmes Agjencisë për Zhvillim të Bujqësisë. Ky rast është duke u trajtuar për pretendimet e konfliktit të interesit dhe për fund agjencia do të nxjerrë vendimin adekuat bazuar në ligj. Jemi në hapat e zhvillimit të hetimeve administrative. E mira në gjithë këtë proces është që procedurat janë pezulluar deri në vendimin e agjencisë”, thotë Buleshkaj.
Në rast se Agjencia për Parandalimin e Korrupsionit gjen se ka pasur shkelje të ligjit apo procedurave të caktuara, duke përfshirë edhe konfliktin e interesit, Buleshkaj vlerëson se do të parandalohet dëmi i buxhetit publik.
Përkitazi me këtë kërkesë, ai thotë se ‘pika mbi këto pretendime’ do të vendoset brenda vitit 2024, duke nxjerrë vendimin adekuat të bazuar në ligj.
“Nëse Agjencia e gjen që këtu ka pasur shkelje të ligjit apo shkelje të procedurave të caktuara apo ka pasur konflikt të interesit atëherë nuk do t’i bëhet dëm buxhetit publik. Por, në qoftë se agjencia përmes ekspertizës vendos që nuk ka pasur shkelje me siguri që Agjencia për Zhvillim të Bujqësisë do të vazhdojë me ekzekutimin e këtyre granteve… Po besojmë që brenda këtij viti do të kryhet si rast dhe do të vendoset pika në pretendimet për konflikt interesi”, potencon Buleshkaj.
Për këtë proces, KosovaPress ka provuar të merr përgjigje edhe nga ministri i Bujqësisë, Faton Peci dhe deputetja Fitore Pacolli, por të njëjtit nuk janë përgjigjur deri në publikimin e këtij artikulli.
Forumi i Rinisë së Lidhjes Demokratike të Kosovës (LDK) ka dorëzuar kallëzim penal ndaj ministrit Peci dhe deputetes së LVV-së, njëherësh kryetare e Komisionit parlamentar për bujqësi, Fitore Pacolli. LDK ka kërkuar dorëheqjen e ministrit të Bujqësisë pasi sipas tyre është keqpërdorur paraja publike.
Zyrtarë të LDK-së, ditë më parë, akuzuan Pecin dhe Pacollin duke thënë se kanë ndikuar që vëllai i deputetes të fitojë grant në vlerë rreth 100 mijë euro.
Lidhur me këtë rast, raportohet se akuzat i mohoi vëllai i deputetes, duke thënë se i ka plotësuar të gjitha kriteret për ta fituar grantin.
