Kandidati për deputet nga rradhët e AAK-së, Arton Demhasaj, ka aluduar se sulmi në Ibër Lepenc nuk do të kishte ndodhur nëse veriu i vendit është çliruar nga bandat kriminale ashtu siç sipas tij e ka ‘shitur’ te opinioni kosovar Qeveria Kurti.
Demhasaj ka deklaruar kështu gjatë një debati për veriun me analistin Xhevdet Pozhari në emisionin “Këndi i Debatit”, në Tëvë1.
“Nëse ti je dal dhe ia ke shitur opinionit kosovar që veriu është çliruar, veriu ka sovranitet, e kemi larguar komplet grupet kriminale nga veriu, si ndodhë pra pastaj të ndodhë sulmi në kanalin e Ibër Lepencit që ishte akoma më i rëndë se sa sulmi paraprak”, është shprehur ai.
Ndryshe, shpërthimi në Ibër-Lepenc – kanalin në veri të Kosovës, prej nga furnizohen me ujë disa qytete dhe termoelektrana të vendit – u shkaktua më 29 nëntor nga rreth 20 kilogramë eksplozivë, sipas Policisë së Kosovës, dhe u cilësua si më i rëndi në infrastrukturën kritike të vendit që nga lufta e viteve 1998/99.
Sulmi shkaktoi dëme të konsiderueshme materiale dhe ndërprerje të furnizimit të rregullt me ujë dhe rrymë në disa zona.
Kryeministri i Kosovës, Albin Kurti, bëri përgjegjëse Serbinë për, siç u shpreh, “sulmin terrorist” dhe tha se ajo është duke i kopjuar metodat që aplikon Rusia në luftën e saj në Ukrainë.
Ndërkaq, presidenti i Serbisë, Aleksandar Vuçiq, mohoi se vendi i tij ka gisht në sulm dhe e dënoi atë./teve1.info/
