Ndonëse Kosova po konsiderohet si shembull për luftimin e terrorizmit, ende e pret shumë punë për luftimin e kësaj dukurie sidomos në këtë periudhë kur është e sfiduar nga ekstremi i djathtë. Kështu u tha me rastin e publikimit të raportit që paraqet angazhimin e Kosovës në parandalimin dhe luftimin e terrorizmit, i realizuar nga Rrjeti Ballkanik për Gazetari Hulumtuese.
Në dy sulme të rënda që cenuan fortë sigurinë e shtetit, institucionet e sigurisë e kaluan testin.
Në Banjskë të Zveçanit në shtator të vitit 2023 u mbrojt sovraniteti dhe integriteti territorial i Kosovës.
Ngjashëm, autoritetet reaguan edhe me 29 nëntor të këtij viti në Ibër Lepenc, ku u sanua menjëherë dëmi në kanalin e ujit.
Por, këto raste, kanë vënë në pah nevojën që zhvillimi i i ekstremizmit të djathtë të elbarohet dhe të trajtohet me prioritet.
Kështu tha ministri i punëve të brendshme, Xhelal Sveçla me rastin e publikimit të raportit që paraqet angazhimin e Kosovës në parandalimin dhe luftimin e terrorizmit, i realizuar nga Rrjeti Ballkanik për Gazetari Hulumtuese.
“Për dallim prej ekstremizmit të dhunshëm dhe terrorizmit religjioz tashmë po ballafaqohemi edhe me ekstremizma të djathta dhe entonacionalizma. Si qeveri kemi ndërmarrë masa në kohë në identifikimin dhe shpalljen e dy formacioneve ilegale si organizata terroriste pra Mbrojtjes Civile dhe Brigadës së Veriut dhe të gjithë ju e dini që në vazhdimësi dhe me mjete ligjore i kemi luftuar dhe po i luftojmë ato, siç e monitorojmë dhe po punojmë në parandalimin e të gjitha aktiviteteve të tyre. Këto dy sulme kanë vë në pah nevojën që zhvillimi i ekstremizmit të djathtë të elaburohet dhe të trajtohet me prioritet nga të gjithë jo vetëm në vendin tonë, por edhe në rajon dhe globalisht”, ka deklaruar ai.
Sveçla u shpreh se si institucionet kanë punuar seriozisht në aspektin strategjik dhe operativ në luftimin e terrorizmit.
“Nga ajo kohë vendi ynë ka dëshmuar se është palë aktive e këtij koalicioni duke marrë përsipër si rikthimin e personave nga zonat e luftës në Siri, ashtu edhe procesin e rehabilitimit dhe riintegrimit në shoqëri. Kudo në botë që flitet për përpjekje në luftën ndaj këtij fenomeni qëndron në radhët e para si storie suksesi Republika jonë”
E drejtori i përgjithshëm i Fondit të Angazhimit dhe Ripërtëritjes së Komunitetit Global, Khalid Koser u shpreh se luftimi i terrorizmit duhet të bëhet në mënyrë të zhdërvjelltë.
“Këto sfida po përballemi me to në baza të ndryshme dhe ne duhet t’i monitorojmë dhe të merremi me to në mënyrë të zhdërvjelltë. Raporti me sa duket ka rekomandime shumë specifike të cilat duhet t’i arri shumë seriozisht këtu në Kosovë. Së pari tregon nevojën për studime empirike që duhet të bëhen, identifikim të grupeve, nxitësve të radikalizimit dhe të cilët janë kryesisht lokal. Duket të kuptojmë se çka ndodh, si ndodh në nivelin lokal dhe zgjidhjet t’i gjejmë në nivel lokal”.
Kurse Kryeredaktori i Kallxo.com, Kreshnik Gashi u shpreh se Kosova ende nuk ka arritur ta bëjë deradikalizimin e shoqërisë.
“Vendi jonë është një prej vendeve më të rrezikuara prej lëvizjeve të ekstremit të djathtë”, ka pohuar ai.
Ndërsa, të gjeturat e raportit i shpalosi, Labinot Leposhtica i cili tha se ka mangësi në komunikimin në mes nivelit qendror dhe lokal.
Gjetja tjetër sipas tij thotë se institucionet janë në fazën fillestare në hartimin e dokumenteve në bazë shkencore për luftimin e terrorizmit.
