Pesë organizata të shoqërisë civile nga veriu i Kosovës, Nisma e Re Sociale (NSI), Qendra për Veprime Pozitive Shoqërore (CASA), Instituti për Zhvillim Ekonomik Territorial (InTER), OJQ Aktiv dhe Qendra për Avokimin e Kulturës Demokratike (ACDC), kanë publikuar një raport të titulluar “Etnizimi i Policisë së Kosovës: Rrënimi i themeleve të Ahtisaarit të një institucioni qytetar dhe multietnik”.
Sipas tyre në raporti thekson një tendencë shqetësuese midis anëtarëve të Policisë së Kosovës, të cilët, përmes rrjeteve sociale, veçanërisht TikTok-ut, promovojnë etnonacionalizmin shqiptar.
“Sjellja e tillë minon parimet themelore të Kushtetutës së Kosovës dhe kuadrin ligjor që përcakton institucionet e sigurisë si multietnike dhe qytetare”.
Tutje thuhet segjetjet kryesore të raportit përfshijnë:
Mbi 14,000 postime në TikTok janë të lidhura me Policinë e Kosovës, nga të cilat mbi 4,000 përdorin hashtag-un #njesiaspecialekosoves.
Këto postime kanë gjeneruar 270 milionë shikime, shpesh me muzikë etnonacionaliste.
Janë dokumentuar mbi 140 fotografi ku shfaqen më shumë se 300 policë duke përdorur simbole dhe gjeste të paligjshme për të theksuar përkatësinë etnike dhe pikëpamjet politike.
Sipas raportit janë evidentu shkelje të të paktën 13 neneve të aktit nënligjor për disiplinën dhe ligjeve që rregullojnë funksionimin e institucioneve. Institucione si Inspektorati Policor i Kosovës dhe misionet ndërkombëtare, përfshirë EULEX-in, nuk kanë reaguar në mënyrë adekuate ndaj këtyre dukurive gjatë tre viteve të fundit, duke e përkeqësuar më tej problemin.
Raporti bën thirrje për veprim të menjëhershëm për të ndalur erozionin e karakterit qytetar dhe multietnik të Policisë së Kosovës dhe për të mbrojtur parimet mbi të cilat bazohen institucionet e Kosovës.
“Në shoqëritë (pas-)konfliktuale të ndara thellë, sjellja kontroverse etnonacionaliste nga anëtarët e institucioneve të grupit shumicë, veçanërisht nga anëtarët e aparatit të sigurisë, ushtrisë dhe policisë, perceptohet si e papërshtatshme, provokuese dhe kërcënuese nga komunitetet e pakicave,” deklaruan organizatat e shoqërisë civile.
