Presidentja e Kosovës, Vjosa Osmani ka mbajtur mbledhjen konstutive me përbërjen e re në Këshillin Konsultativ për Komunitete.
E para e vendit ka thënë se Këshilli Konsultativ për Komunitete është dëshmi e përkushtimit të Kosovës për ndërtimin e një shoqërie të drejtë, të barabartë dhe gjithëpërfshirëse për të gjithë qytetarët.
Në fjalimin e saj, Osmani theksoi përkushtimin e saj të palëkundur për të siguruar që çdo qytetar pa dallim etnie, feje apo gjuhe të ndihet pjesë e vlerësuar dhe aktive e shoqërisë së Kosovës.
Madje presidentja, vuri në dukje arritjet kryesore të këtij Këshilli përgjatë këtij viti, duke ofruar mbështetjen e plotë në përmbushje të objektivave.
Në fjalimin e saj ndër të tjera, Osmani ka ripohuar prioritetin e Presidencës për ta mbrojtur sigurinë dhe dinjitetin e çdo individi, duke siguruar që asnjë qytetar të mos margjinalizohet apo diskriminohet.
“Një Kosovë e sigurt për fëmijët tanë në një botë ku siguria çdo ditë e më shumë rrezikohet nga forca të errëta dhe destabilizuese është një synim që na bashkon të gjithëve. Për Presidencën, ky është një prioritet dhe një angazhim i përditshëm. Ne duhet të ecim besimplotë drejt integrimit, qoftë brenda vendit, qoftë në proceset euroatlantike”, ka theksuar presidentja.
Osmani tha se fuqizimi i komuniteteve është një përgjegjësi institucionale dhe një angazhim i drejtë që fuqizon shtetin tonë./teve1.info/
