Presidenti i Koresë së Jugut zëvendësoi ministrin e Mbrojtjes ndërsa partitë opozitare synojnë të votojnë një mocion për shkarkimin e të dyve, pas vendimit për shpalljen e gjendjes së jashtëzakonshme, që çoi në mobilizim të forcave të armatosura dhe vendosjen e tyre në rrugët e Seulit.
Gjendja e jashtëzakonshme zgjati vetëm 6 orë, pasi Parlamenti e hodhi poshtë vendimin e Presidentit me votim unanim dhe ai u detyrua ta anulonte vendimin.
Partitë opozitare synojnë të votojnë një mocion për shkarkimin e Presidentit Yoon Suk Yeol të shtunën në mbrëmje. Partitë opozitare kanë 192 vende, por për miratimin e mocionit nevojiten 200 vota.
Zyra e Presidentit Yoon njoftoi se ai kishte vendosur zëvendësimin e ministrit të Mbrojtjes Kim Yong Hyun me Choi Byung Hyuk, një gjeneral në pension i cili aktualisht është ambasador i Koresë së Jugut në Arabinë Saudite.
Presidenti Yoon nuk është shfaqur publikisht që nga dita kur njoftoi në televizion se kishte hequr gjendjen e jashtëzakonshme.
Më herët, partitë e opozitës kishin depozituar një mocion për shkarkimin e ministrit të Mbrojtjes Kim, duke ngritur dyshimet se ishte ai që i sugjeroi Presidentit Yoon vendosjen e gjendjes së jashtëzakonshme.
Ministri Kim kishte ofruar të jepte dorëheqjen dhe kërkoi ndjesë që shkaktoi shqetësim tek opinioni publik.
Presidenti Yoon e shpalli gjendjen e jashtëzakonshme i zemëruar me opozitën, duke u zotuar të eliminojë forcat “anti-shtetërore”, ndërsa ndeshet me probleme me opozitën që ka shumicën në parlament që ai e akuzon si simpatizuese të Koresë së Veriut komuniste./VOA
