Për shpërthimin në kanalin kryesor të Ibër-Lepencit në Zubin Potok, analisti, Xhevdet Pozhari, thotë se fajtore mundet me qenë Serbia, derisa reagoi vetë e para.
Sipas Pozharit, reagimi i Vuçiqit, i cili “ofroi ndihmë” për sanimin e dëmit, për Pozharin nënkupton “lojën” e Millosheviqit që luante gjatë luftës së fundit në Kosovë.
“Nuk është larg mendsh që fajtori reagon i pari. Edhe Vuçiqi tha që ne ofrojmë ndihmë për sanimin e dëmeve, njëjtë siç bënte Millosheviqi dikur që thoshte në ’99-tën ‘ne po e mbrojmë popullatën që po e vret NATO-n. Kjo është ajo politika, ka ndryshuar vetëm paketimi, por përmbajtja ka mbet e njëjtë. Ne flasim për një kohë kur Kosova vazhdon të jetë ende nën masa, ndërsa ndaj Serbisë përveç këtyre deklaratave që kësaj radhe janë më të ashpra nga ShBA-ja – ende nuk ka një reagim konkret”, tha ai në emisionin “Këndi i Debatit” në Tëvë1.
Ndërkohë, Serbia e ka mohuar përfshirjen në sulmin ndaj kanalit të Ibër-Lepencit në veri të Kosovës, duke thënë se dënon shpërthimin si “të papranueshëm dhe të patolerueshëm”, i cili në “mënyrën më të drejtpërdrejtë” rrezikon nevojat themelore jetësore të popullit serb në Kosovë.
Ndërkaq, autoritetet kosovare e akuzuan menjëherë Serbinë se ka gisht në këtë sulm.
Kryeministri i Kosovës, Albin Kurti, tha se Serbia është përgjegjëse për “sulm kriminal dhe terrorist”, i cili, sipas tij, ka synuar “ta dëmtojë infrastrukturën mbase më të rëndësishme” të vendit./teve1.info/
