Kryeministri i Kosovës Albin Kurti, i ka komentuar deklaratat e presidentes Vjosa Osmani, ku në fjalimin e saj vjetor në Kuvend ndër të tjera, ajo tha se nuk bën të luhet bixhoz me aleatët, duke iu referuar raporteve të tensionuara të Qeverisë e Kurtit me ta.
Kurti tha se gjithmonë ka qenë në komunikim edhe me presidenten Osmani sa i përket politikës së jashtme.
“Unë vazhdimisht kam qenë në komunikim, bashkërendim me presidenten Osmani, kryeparlamentarin Konjufca dhe ministren Gërvalla sa i përket politikes së jashtme. Të arriturat i kemi të përbashkëta dhe kësisoj duhet të vazhdohet. Të gjitha vështirësitë, sfidat nuk ka të tilla që nuk i tejkalojmë. Besoj që kurrë nuk ka qenë veriu më si sigurt se tani”, tha Kurti në vënien e gurthemeleve për tri projekte në Podujevë, raporton RTK.
Ndryshe, Kurti sot bashkë me kryetarin e Komunës së Podujevës, Shpejtim Bulliqi, ministra, deputetë e zyrtarë tjerë nga niveli lokal e qendror ka marrë pjesë në vënien e gurthemeleve të tri projekteve në Podujevë.
Vendosja e gurthemelit u bë për ndërtimin e sallës sportive në shkollën “Ali Ajeti”, në fshatin Sfeçël, për ndërtimin e Qendrës së Kompetencës në fshatin Livadicë dhe për ndërtimin e Tregut të Gjelbër në Podujevë.
