Në mars të vitit 2022 u krijua Fondi i Sigurisë përmes së cilit qytetarët kanë dhuruar vullnetarisht mjete financiare për ushtrinë e vendit por që deri më tani nuk janë dhënë detaje për shumën që është mbledhur në fond. E për këtë po kërkohet më shumë transparencë nga pushteti.
Janë bërë më shumë se dy vjet që kur është themeluar Fondi i Sigurisë.
Por për këtë fond i cili është dedikuar për investime në ushtrinë e vendit, ende nuk është dhënë asnjë informacion nga Qeveria për shumën që është mbledhur.
Megjithatë kontributet e qytetarëve në këtë po kërkohen të bëhen publike pasi vlerësohet se nuk janë sekret shtetëror.
Deputetja e PDK-së, Ganimete Musliu hedh dyshime se i njëjti është keqpërdorur nga partia në pushtet.
“As ministri i FSK-së nuk ka asnjë informatë për këtë fond dhe nuk ka askush as mediat as Kuvendi dhe askush tjetër nuk ka informacion dmth mundësitë për kepërdorim të këtij fondi janë të jashtëzakonshme dhe ne poi afrohemi fushatës, Albin Kurti mundet që komplet atë fond, ato mjete të padeklaruara dhe të pa prezantuara t’i derdhë në fondin e tij zgjedhor”, tha Musliu.
Ajo jep edhe një propozim në mënyrë që një fond i tillë të jetë më efikas dhe më kredibil.
“Ne duhet ta bëjmë një ligj me 3 ose 4 nene nuk kemi nevojë me filozofu, ai ligj të mbikëqyret nga Kuvendi i Kosovës të gjitha partitë opozitare kanë qenë pro këtij ligji, silleni në Kuvend e votojmë e bëjmë ligj obligativ të gjithë ata që marrin pagë nga shteti të obligohen që të ndajnë një përqindje nga paga e tyre për Fondin e Sigurisë dhe unë jam e bindur plotësisht se secili qytetar do të ishte i kënaqur që do të kontribuonte direct në këtë fond”, tha ajo.
E nga Instituti i Kosovës për Drejtësi vlerësojnë se mostranparenca për këtë fond është e kundërligjshme nga ana e pushtetit.
Hulumtuesi Gzim Shala thotë se vetë fakti që buxheti për fushën e mbrojtjes është publik, nuk ka arsye që mos të jipen informacione për Fondin e Sigurisë.
“Definitivisht kemi të bëjmë me një klasifikim të kundërligjshëm dhe kjo është arsyeja pse kemi kërku deklasifikimin për shkak se nuk ka asnjë arsye bazë, asnjë arsye ligjore që përmbushet në rastin konkret për ta klasifikuar këtë fond si të tillë. Po flasim në situatën kur çështja e rrezikut përmendet vetëm në mënëyrë abstratke dhe jo konkrete dhe vendimi për klasifikim përmbanë një arsyetim të dobët, një arsyetim jo profesional dhe të pambështetur në dispozita ligjore”, tha Shala nga IKD.
Tëvë1 ka kërkuar një qëndrim për këtë edhe nga Ministria e Punëve të Mbrojtjes, mirëpo gjatë javës nuk kanë kthyer përgjigje.
