Ministri i Punëve të Brendshme, Xhelal Sveçla, ka vizituar të enjten Komandën e Përgjithshme të Armatës së Karabinierëve në Itali, ku është takuar me shefin e Shtabit të Komandës, gjeneralin Andrea Taurelli Salimbeni.
Përmes një njoftimi, Sveçla bëri të ditur se gjatë takimit është diskutuar për progresin e arritur në fushën e sigurisë në Kosovë, si dhe për kontributin e pjesëtarëve të Karabinierëve në mbështetje të institucioneve të vendit dhe ruajtjen e paqes e stabilitetit.
Një ndër temat kryesore të diskutimit ishte edhe mundësia e thellimit të bashkëpunimit për themelimin dhe zhvillimin e Xhandarmërisë së Republikës së Kosovës, që sipas Sveçlës përbën një prioritet të Qeverisë.
Ai ka thënë se shkëmbimi i përvojave dhe ekspertizës profesionale me partnerët italianë mund të kontribuojë në zhvillimin e kësaj komponente të sigurisë, në përputhje me standardet dhe praktikat më të mira.
Sveçla ka ritheksuar se bashkëpunimi me partnerët ndërkombëtarë mbetet i rëndësishëm për forcimin e kapaciteteve institucionale dhe avancimin e sigurisë në vend.
“Do të vazhdojmë të thellojmë bashkëpunimin në funksion të garantimit të sigurisë, ruajtjes së paqes dhe stabilitetit, si dhe mbrojtjes së qytetarëve tanë”, ka përfunduar ai./teve1.info/
