Presidentja, Vjosa Osmani në fjalimin para deputetëve kritikoi punën e ekzekutivit. Kjo po shihet si konfirmim i përçarjes së saj me kryeministrin Kurti. Derisa vlerësohet se mund të lidhet edhe me fatin e saj politik pas mandatit si presidente.
Për herë të katërt brenda mandatit, doli për adresim para Kuvendit të Kosovës.
Por, për dallim nga herat tjera, të enjten presidentja, Vjosa Osmani ishte më e ashpër ndaj kryeministrit, Albin Kurti.
Ajo theksoi disa nga çështjet e ndjeshme politike nisur nga raportet me aleatët për të cilët tha se nuk i ka mirëkuptuar talljet që bëhen në llogari të tyre.
Derisa shpjegoi se nuk ka kërkuar themelimin e Asociacionit por që drafti të diskutohet me SHBA-të.
E ish-diplomati, Donat Syla në emisionin “InfoNata” në Tëvë1 është shprehur se është e qartë që mes Kurtit dhe Osmanit ka përçarje të cilat sipas tij me afrimin e zgjedhjeve po shpërfaqen më shumë.
“Në periudhën kritike në të cilën jemi aktualisht unë konsideroj që nëse mund të flasim me terminologjinë e armëve do të thosha se kryeministri po e luan rolin e silenciatorit e presidentja atë të zhurmuesit. Them kështu sepse është një periudhë shumë delikate për Kurtin i cili është aktualisht edhe kryetar i partisë më të madhe në vend dhe ai e din se në këtë kohë i nevojitet qetësia dhe nuk dëshiron të jap mesazhe të cilat e dëmtojnë një pjesë të elektoratit të tij”, tha ish-diplomati, Donat Syla.
E profesori i shkencave politike, Dorajet Imeri vlerëson se në fjalimin e Osmanit ka pasur një diskrepancë me punën e saj katër-vjeçare.
Sipas tij, kjo mund të lidhet edhe me fatin e saj politik që do ta ndjekë pas mandatit si presidente e vendit.
“Qeveria e re një nga sfidat kryesore do të ketë zgjedhjen e Presidentit dhe në rrethanat në të cilat tashmë jemi vështirë se mund të planifikohet që znj.Osmani të jetë presidente në mandatin e ardhshëm dhe gjithë kjo lë të nënkuptohet që si qëndrimi i saj i deritanishëm si ky tash e tutje lidhet ekskluzivisht me raportin që ajo do ta ndjekë me pozitën e saj politike si individ dhe natyrisht krisja e raporteve me LVV-në dhe një përafrim i mundshëm me LDK-në është një tregues i qartë se ajo do të ndjekë vetëm agjendën e saj personale”, tha Imeri.
Osmani ka paraqitur pakënaqësitë e saj me Qeverinë edhe në deklarime tjera publike.
