Kurti tha se dëshmorët janë dëshmitarët aktivë të secilit hap të bërë prej paraardhësve dhe prej pasardhësve.
“Dëshmorët janë dëshmitarët aktivë të secilit hap të bërë prej paraardhësve, prej nesh dhe prej pasardhësve tanë, në udhëtimin tonë të përbashkët që kurrë nuk përfundon, të quajtur histori. 5 maji është dita e përkujtimit të veprës së tyre, kurse liria jonë, është vetë kjo vepër, e jetuar si gjendje prej të gjallëve të secilit brez, të shkuar, të tashëm dhe atyre që do të vijnë. Ata janë emra të përveçëm, të rënë në grup apo individualisht, në rrugë dhe kohëra të ndryshme, që shkojnë e shkrihen në një vorbull që përmbledhë të gjitha lëvizjet e shqiptarëve për liri. Dhe të gjithë këta emra individësh, kanë një emër të përbashkët, emërtuesin e tejkohshëm të dëshmorit të kombit”, ka shkruar Kurti.
Tutje, Kurti ka thënë se varret e dëshmorëve janë të shpërndarë nëpër të gjitha tokat shqiptare, por fryma e tyre përbashkohet në panteonin e lirisë, shkruan teve1.info
Më tej, Kurti theksoi se vendet ku kanë rënë dëshmorët janë shenja orientuese në rrugën e traditës si mënyrë e të jetuarit dhe të historisë si praktikë dhe e vetërealizimit të qenies tonë politike.
“Varret e tyre janë të shpërndarë nëpër të gjitha tokat shqiptare, por fryma e tyre përbashkohet në panteonin e kudondodhur të lirisë tonë. Trupat e dëshmorëve, janë relike sakrale të besimit më profan të historisë, besimit te liria. Vendet ku ata kanë rënë, janë shenja orientuese në rrugën tonë të traditës si mënyrë e të jetuarit dhe të historisë si praktikë e vetërealizimit të qenies tonë politike. Përkujtimi i dëshmorëve është i anasjelltë, sepse duke përkujtuar veprimtarinë e tyre, ne ia përkujtojmë vetes në kujtesën tonë kolektive rrugën e kësaj vepre, atë rrugë që pavarësisht kahjeve që zgjedhim a drejtimeve që ndjekim, nuk duhet lëshuar asnjëherë”, tha Kurti.
“Lavdi të gjithë dëshmorëve të kombit shqiptar dhe qoftë i bekuar secili që mirëmban veprën e tyre”, shtoi ai.
