Kombëtarja U-21 e Kosovës në futboll, ka filluar përgatitjet për dy ndeshjet miqësore që i luan kundër Maqedonisë së Veriut, ka njoftuar të martën Federata e Futbollit të Kosovës (FFK).
Stërvitjen e parë, “Dardanët” e rinj e kanë zhvilluar në stadiumin “Agron Rama” në Obiliq, ndërsa dy ndeshjet kundër Shpresave të Maqedonisë së Veriut, Kosova U21 do t’i zhvilloj në Shkup.
Ndeshjen e parë e zhvillojnë të enjten nga ora 13:00, kurse të dytën më 17 nëntor nga ora 12:00.
Të dyja ndeshjet, do të luhen në kampin e Federatës së Futbollit të Maqedonisë së Veriut, ku miqësorja e parë nis në orën 13:00 kurse e dyta luhet prej orës 12:00.
Selektori i Kosovës U-21, Afrim Tovërlani, pret nga lojtarët e ftuar t’i dëshmojnë vlerat e tyre.
“Gjenerata është ndërruar, kemi vetëm tre apo katër futbollistë nga grumbullimi i mëparshëm. Kjo është stërvitja e parë dhe takimi i parë me disa prej lojtarëve të rinj. Do të zhvillojmë një lojë mes vete për të marrë më shumë informacione dhe për të kuptuar situatën e secilit prej tyre. Kjo do të na shërbejë për të parë ekipin dhe për të planifikuar përbërjen e skuadrës. Është një mundësi për lojtarët të tregojnë nëse e meritojnë të jenë pjesë e Kombëtares U21 të Kosovës”, ka thënë Tovërlani për FFK-në.
Futbollistët, Leon Zeqiraj dhe Etnik Brruti, premtojnë maksimumin dhe vlerësuan miqësoret me Maqedoninë e Veriut si përballje të rëndësishme.
“Ndjehem shumë mirë që kemi këtë mundësi. Grupi është i shkëlqyer dhe loja jonë është mirë e organizuar. Mund të luajmë shpejt dhe të realizojmë pasime të shkurtra, gjë që na ndihmon të zhvillojmë një lojë të shpejtë dhe të strukturuar”, tha ndër të tjera Zeqiraj.
Ndërkohë, Brruti shtoi: “Këto dy miqësore me Maqedoninë e Veriut janë një test i vlefshëm për ne lojtarët dhe për stafin. Na ndihmojnë për të vlerësuar formën e secilit prej nesh dhe për të përmirësuar lojën për ndeshjet e ardhshme. Ne jemi të fokusuar maksimalisht për të dhënë më të mirën dhe për të arritur fitore”.
