Disa lokale janë përfshirë nga zjarri mëngjesin e sotëm në fshatin Sllatinë e Madhe. E njëri prej pronarëve tha për televizionin se dëmi që pësoi kap vlerën rreth 30 mijë euro.
Disa lokale u përfshinë nga zjarri në fshatin Sllatinë të Madhe në vendin e njohur “Te pishat”
Disa prej pronarëve nuk pranuan të flasin para kamerës mirëpo treguan se nga ku filloi zjarri.
E njëri prej pronarëve që deshi të mbesë anonim, tha se ka pësuar dëm rreth 30 mijë euro.
“Këtu po foli vetëm për biznes timin dikund 25 mijë euro vetëm si kafe por i kam pasur edhe dy motoçikleta që lëshoj me qera dhe biçikletat e i kam lënë këtu natën pasi shtëpinë e kemi më poshtë, me ato dëmi është rreth 30 mijë euro që është bërë këtu si biznes”, tha një nga pronarët e lokaleve të djegura.
Rastin për televizionin e ka konfirmuar zëdhënësi i policisë për rajonin e Prishtinës, Agron Borovci, i cili ka thënë se nuk raportohet për të lënduar.
“Rreth orës 05:00, është pranuar informata për një zjarr në disa lokale në fshatin Sllatinë e Madhe. Policia menjëherë ka dalë në vendin e ngjarjes, ka ftuar zjarrfikësit të cilët kanë lokalizuar zjarrin. Deri më tani nuk raportohet për të lënduar përveç dëmeve të konsiderueshme materiale. Aktualisht policia në koordinim me prokurorin e shtetit ka nisur ndërmarrjen e veprimeve hetimore për sqarimin e plotë të rrethanave që karakterizojnë ngjarjen”, thuhet nga Policia.
Sipas shefit të Brigadës së Zjarrfikësve në Prishtinë, Malë Gashi ekipet e zjarrfikësve menjëherë kanë dalë në vendin e ngjarjes.
“Ekipet e zjarrfikësve menjëherë kanë dalë në vendin e lartpërmendur. Në zjarr ishin të përfshirë një minimarket dhe një lokal, dhe zjarri ishte në fazën më të lartë të zhvillimit, pra, tërësisht ishin të përfshirë nga zjarri. Nga ky zjarr rrezikoheshin edhe objektet tjera në afërsi”, tha Gashi.
I njëjti pronar që të enjten u dëmtua, bëri të ditur se edhe para dy vitesh i kishte ndodhur një rast i njëjtë në një lokal në Sllatinë, mirëpo ai tha se nuk i është kompensuar dëmi që kishte pësuar në vlerë prej 60 mijë euro.
