Një ditë pas fitores ndaj Sigal Prishtinës në Superligën e Kosovës në basketboll, skuadra e Vëllaznimin ka prezantuar trajnerin e ri.
Kroati Jeronimo Sarin do të jetë në krye të ekipit gjakovar për pjesën e mbetur të sezonit, duke e zëvendësuar në këtë post Branimir Paviqin e larguar javën e shkuar.
Sarin e udhëhoqi Vëllaznimin të hënën mbrëma kundër Prishtinës në ndeshjen e fundit të xhiros së shtatë, të cilën gjakovarët e fituan me rezultatin 101:85.
Kroati Sarin e njeh mirë basketbollin në Kosovë, pasi në të shkuarën ka udhëhequr disa skuadra tjera, duke pasur edhe suksese.
Ai ka qenë trajner i Prishtinës dhe ka fituar titullin dhe kupën e Kosovës në vitin 2017, ndërsa ka drejtuar edhe skuadrën e Bashkimit dhe të Pejës.
Gjatë karrierës si trajner, Sarin ka punuar jo vetëm në Kroaci por edhe në Turqi, Poloni, Belgjikë, Francë, Austri e Çeki.
Skuadra e Vëllaznimit pas shtatë ndeshjeve të luajtura në Superligë, është e pesta në tabelë me 10 pikë kurse në vikend luan në udhëtim kundër Pejës.
