Isuf Kajdomçaj ka dorëzuar fotografitë e luftës dhe uniformën e ushtrisë në Kullën e Qëndresës në Lubizhdë të Hasit. Ai e viziton këtë vend shpesh dhe kujton momente nga ditët e netët e rrethimit nga ushtria serbe.
Në Kullën e Qëndresës ka dorëzuar uniformën e ushtrisë.
E të shpeshta janë vizitat që i bën në këtë vend.
Në këtë mënyrë, Isuf Kajdomçaj rikujton periudhën e luftës.
Por për ish-Komandantin e Shtabit Lokal të Hasit, dalja në front të luftës nuk ishte dhe aq e lehtë.
“Nuk ka qenë bash e lehtë për shkak se unë kam qenë i martuar, kam pasë fëmijë.I kam pasë katër fëmijë në atë kohë, po fillimisht nuk e ka ditë kërkush prej familjes edhe pse aktivitetet kanë qenë shumë më të hershme. Unë e kam ndje për vete një barrë koxha të madhe edhe nuk jam ndalë deri në momentin e fundit kur është çliru atdheu”, shprehet Kajdomçaj.
Për të është i rëndë kujtimi kur fshati Lubizhdë u rrethua në të gjitha anët.
E kjo kishte ndodhur kur gjatë vitit 98-të, 18 anëtarë të Shtabit të Përgjithshëm të UÇK-së kishin ardhur në këtë vend.
“Është mbledhë popullata te shkolla e fshatit edhe aty pastaj kanë vazhdu maltretime edhe me familjarë edhe me gra edhe me rob e me fëmijë e me krejt ata kanë pësu, i kanë rrahë i kanë maltretu po ka dashtë Zoti kërkush s’ka folë”, tregon ai.
Ndërsa dorëzimi i fotografive të luftës dhe veshjeve të ushtrisë në Kullën Muze, për Isuf Kajdomçaj kanë një domethënie të veçantë.
“Në momentin që e kemi përfundu, këto rroba kanë qenë të miat gjatë luftës që i kam pasë, i kam marrë komplet qysh i kam pasë tek shtëpia, i kam marrë i kam pru në muze për me i lënë përjetë që të mbeten vetëm kujtim i luftës, dmth ia kam lanë kullës muze”, shprehet ai.
Kulla Muze është ndërtuar vitin e kaluar, për të kujtuar edhe kullat e tjera të qëndresës të fshatit Lubizhdë të Hasit.
