Ambasadori i Britanisë së Madhe në Kosovë, Jonathan Hargreaves, të hënën ka vizituar Qendrën Burimore për Persona të Pagjetur në Prishtinë. Nga kjo qendër kërkuan mbështetjen e ambasadës për çështjen e të pagjeturve, të cilën ua premtoi vet ambasadori britanik. Nikoqiri e mysafiri, patën edhe dhurata për njëri – tjetrin.
E të hënën u bën bashkë edhe një herë në Qendrën Burimore për Persona të Pagjetur në Prishtinë.
Kjo pasi kjo qendër, po e pret një mysafir të rëndësishëm.
E nuk vonoi shumë, mysafiri erdhi.
Me vete, ambasadori i Britanisë së Madhe në Kosovë, Jonathan Hargreaves, solli edhe një dhuratë, e cila e emocionoi drejtorin e kësaj qendre, Bajram Qerkinaj.
Ishte një fotografi që ky i fundit e bëri me mbretin Charles i Tretë, kur ky ishte në cilësinë e princit.
E duket se tani mbreti, do të dëgjojë edhe një herë për Kosovën.
“Pas disa javësh do të takohem me mbretin dhe do t’i tregoj për takimin e sotëm me bacën Bajram dhe familjarët. E di se ka 10 vite që kur ai ka qenë këtu, por e di gjithashtu që ai e mban në mend këtë vend dhe juve po ashtu”, u shpreh ambasadori britanik.
E dhuratë për ambasadorin, pati edhe vet nikoqiri.
“E kam një dhuratë të vogël, të kombinatit “Trepca” të cilën Anglia e ka zbuluar e unë kam punuar 38 vjet në miniera”, tha Bajram Qerkinaj.
Gjuhën shqipe duket se ka filluar ta njoh ambasadori britanik.
Por, të hënën këtë e pasuroi me një fjalë të re.
Mbështetjen e Britanisë së Madhe në çështjen e të pagjeturve, e kërkoi drejtori i kësaj qendre.
“Për juve si nana, edhe për mua si Bajram, hajde të këqyrim që në të ardhem mos t’i lëmi armiq fëmijët tanë. 3:18 Kerkoj nga ambasadori që të kenë parasysh t’i kemi disa punëtori apo disa grante që të punojmë me gjeneratat e reja të cilët nuk dijnë me shku prej Leposaviqit në Kaçanik”, u shpreh Qerkinaj.
E përgjigja nga ambasada britanike në Kosovë, ishte pozitive.
“Shpresoj se e dini se ne si Britani e Madhe në nivelin politik jemi duke bërë gjithçka që mundemi ta mbështesim Bashkimin Evropian dhe miqtë e tjerë që t’i lëvizim politikat për të sjellë pajtimin më afër dhe natyrisht në çështjen absolutisht të rëndësishme, e që është çështja e personave të zhdukur”, tha ambasadori.
Ndryshe, edhe kur kanë kaluar 25 vjet që nga përfundimi i luftës në Kosovë, ende nuk dihet gjë për fatin e afër 1600 personave të zhdukur.
