Uji në liqenin e Badocit ende vazhdon të jetë i papijshëm për shkak të vlerave të larta të manganit. KRU PRISHTINA për të furnizuar qytetarët me uji ka vënë në lëvizje auto botët, por një pjesë po detyrohen edhe të blejnë. Infektologu Hamdi Ramadani tregon problemet shëndetësore që sjell përdorimi i këtij uji.
Nga Liqeni Badocit i cili gjendet 5 kilometra larg Prishtinës, furnizohen me ujë të pijshëm banorët e kryeqytetit, e të Graçanicës.
Por tash e një javë uji i cili vjen nga ky liqen nuk përdoret për pije.
Pasi nga e premtja e kaluar vlerat e manganit kanë shënuar rritje në këtë liqen.
E për të mos i lënë banorët pa ujë, Kompania e Ujësjellësit “KRU PRISHTINA” ka vënë në lëvizje auto botet e mbushura me ujë.
Për tu furnizuar ujë të enjten në lagjen “Bregu i Diellit”, doli edhe Selim Bonjaku.
“Probleme me uji nuk po kemi por me u pi nuk po pihet. Po duhet me ble, tre katër ditë na bënë qikjo kantë”, tha Selim Bonjaku, qytetar.
E dikush tjetër ka një pyetje për mos zgjidhjen e këtij problemi.
“Rrofshin pensionet që na kanë rrit 20% e po blejmë uji, po duhet me ble. Çka bon ky shtet që 50% ë banorëve të Prishtinës furnizohen me uji nga Badovci e nuk e zgjen problemin. Kjo ndodh pasi inxhinieret e vjetër i kanë gju në bërllok që rezultati i të rinjve”, tha Nijazi Tafilaj, qytetar.
Nga Kompania Rajonale e Ujësjellësit, thonë se ky është një problem i cili vjen për shkaqe natyrore dhe ndodhë në të gjithë botën.
Zëdhënësja e KRU Prishtina, Arjeta Mjeku tregon se kur lejohet të konsumohet ky ujë.
“Uji tash për tash duhet të përdoret vetëm si uji teknik për pastrim gjeneral të shtëpisë, për të bërë dush, sepse mangani nuk ndikon në lëkurë por një herë për një herë nuk duhet ta përdorin për pije dhe përgatitje të ushqimit ndërsa uji në auto bote është 100% komforë standardëve për ujë të pijshëm. Është një dukuri hemiotermike ditët janë shumë të nxehta e netët e ftohta nuk ndodh vetëm me liqenin e Badocit ndodhe me të gjitha liqenet anë e kënd botës”, tha ajo.
Infektologu Hamdi Ramadani tregon problemet shëndetësore që sjell konsumimi i ujit me nivel të lartë të manganit.
“Doza e lartë e manganit paraqet probleme madhore te cilat mund te jenë te llojllojshme qoftë nga aparati i sistemi gastrointestinal, ne mjekësi që e quajmë të tugës apo nauzesë të dhimbjeve të barkut të vjellave apo barkqitjeve. Na aparati i sistemi nervor qendror mund të ketë dhimbje të kokës”, tha ai.
Kjo nuk është hera e parë që në liqenin e Badocit ka pasur ngritje të vlerave të manganit. Edhe në vitin që lamë pas për javë të tëra “KRU PRISHTINA” është përballur me problemin e njëjtë.
