Kryetari i Federatës së Basketbollit të Kosovës (FBK), Arben Fetahu ka folur pas largimit të Rami Hadarit nga posti i selektorit të kombëtares së Kosovës.
Hadar para se të largohet nga “Dardanët” është larguar edhe nga KB Peja, duke ofruar dorëheqje në të dy postet që i kishte.
Për largimin e papritur të Hadarit është prononcuar edhe kreu i FBK-së, Fetahu, i cili në një intervistë për “Kosova Press” ka zbuluar arsyet e vërteta në lidhje me trajnerin izraelit.
Sipas Fetahut, Hadar që kishte kontratë me FBK-në deri në vitin 2026, ka kërkuar të largohet për arsye personale, përfshirë këtu edhe zhvillimet e fundit që po ndodhin në vendlindjen e tij.
“Ka qenë vendim i papritur edhe për mua, edhe për ne në Federatën e Basketbollit të Kosovës. Trajneri Hadar ka kërkuar që për arsye personale të tërhiqet nga pozita e selektorit, ne e kemi pranuar kërkesën e tij gjatë ditës së djeshme, e kemi edhe komunikimin zyrtare me atë që e pranojmë kërkesën e tij për dorëheqje. Arsyet janë sigurisht subjektive, ne kemi bashkëndjerë më atë që trajneri Hadar ka përjetuar gjatë gjithë këtij viti të fundit në kuptim të trazirave dhe gjithçka rreth asaj që po ndodh në Izrael dhe përfundimisht kërkesa e tij me shkrim ka qenë që për arsye personale dëshiron të tërhiqet”, shpjegoi fillimisht Fetahu.
Tri ditë para se FBK-ja, të konfirmonte largimin e Hadarit, trajneri nga Izraeli në deklaratën e tij pas humbjes së Pejës nga Golden Eagle Yllit, kishte shprehur pakënaqësi të mëdha me zhvillimin e basketbollit kosovar. Madje, ai nuk i kishte kursyer nga akuzat as gjyqtarët e ndeshjeve.
“Sigurisht që trajneri Hadar e ka marrë këtë vendim para së të jap një deklaratë të tillë, ky është një hamendësim i imi sepse personalisht nuk kam biseduar me atë pas gjithë asaj që ka ndodhur, por nga informatat që kam, ai e ka ditur që dhënia e një deklarate të tillë është një paralajmërim për Federatën e Basketbollit të Kosovës që do të ndahen rrugët me kaq dhe ajo që unë mund t’iu dhe me 100 për qind siguri është se zyrtarisht ai ka kërkuar të dorëhiqet për arsye personale”, shtoi Fetahu.
Fetahu foli edhe për emrat potencial që pritet ta zëvendësojnë Hadarin në krye të Kosovës. Hadar vitin e shkuar firmosi kontratë me FBK-në dhe në gjashtë ndeshje nën drejtimin e tij, “Dardanët” regjistruan tri fitore dhe po aq humbje.
“Ajo që mund t’iu them në këtë moment se të gjithë trajnerët, edhe vendor edhe ndërkombëtar jemi duke i konsideruar me shumë kujdes edhe duam që ta bëjmë përzgjedhjen më të mirë. Natyrisht unë i vlerësoj shumë pjesëtarët e shtabit teknik që janë brenda shtabit teknik vendor edhe trajnerët ndërkombëtarë ne kemi vazhdimisht oferta për bashkëpunim prej trajnerëve me shumë renome jashtë vendit. Jemi duke i vlerësuar të gjitha opsionet”, u shpreh Fetahu.
Muajin e ardhshëm, Kosova do t’i luaj dy ndeshje në kuadër të parakualifikimeve për Kampionatin Botëror të vitit 2027.
“Dardanët” do të përballen me Zvicrën dhe Irlandën.
