Ka përfunduar shqyrtimi fillestar në rastin Banjska, ku njëri prej të akuzuarve, Dushan Maksimoviq mohoi fajësinë, kurse Blagoje Spasojeviq dhe Vladimir Toliq, nuk deshën të deklarohen për akuzat në këtë fazë të procedurës. Por, një gjë e tillë, u konsiderua si mospranim i fajësisë.
Me armë të gjata qëndronin në hyrje të Gjykatës Themelore në Prishtinë.
Krejt kjo përgaditje e autoriteteve të sigurisë pasi aty do të mbahej shqyrtimi fillestar në rastin e Banjskës, ku mbeti i vdekur rreshteri i policisë, Afrim Bunjaku.
Në gjykatore nën masa të sigurisë, u paraqitën tre të akuzuarit, Blagoje Spasojeviq, Vladimir Toliq dhe Dushan Maksimoviq.
Prokurori i rastit lexoi aktakuzën që u ngarkohet kësaj tresheje.
“Të akuzuarit Blagoje Spasojeviq, Vladimir Toliq dhe Dushan Maksimoviq, duke vepruar sipas planit të organizuar mirë paraprakisht, përmes përdorimit të dhunës përmes armatimit të rëndë kanë tentuar që të shkëpusin pjesën veriore të territorit të Republikës së Kosovës, respektivisht komunat e banuara me shumicë serbe, dhe këtë pjesë të terrritorit t’ia bashkojnë territorit të Republikës së Serbisë. Me ç’rast, si rezultat i dhunës së përdorur ka vdekur zyrtari policor Afrim Bunjaku, dhe është rrezikuar jeta e zyrtarëve tjerë policor dhe popullatës civile”, tha prokurori Naim Abazi.
Maksimoviq nuk e pranoi fajësinë për këto akuza që e ngaron prokuroria.
“I nderuar gjyqtar, unë jam i vetdijshëm që shumicë në këtë sallë, po mendojnë se jam i përfshirë në këtë vepër penale. Mirëpo unë deklarohem se nuk jam fajtor dhe nuk kam lidhje me këtë aktakuzë me të cilën unë ngarkohem”, tha i akuzuari Dushan Maksimoviq.
Kurse Spasojeviq dhe Toliq nuk u deklaruan rreth fajësisë, për çka konsiderohet se ata mohojnë fajësinë.
“Tani për tani nuk dua të deklarohem rreth fajësisë”, tha i akuzuari Blagoje Spasojeviq.
“Në këtë fazë të procedurës nuk dëshiroj të deklarohem rreth aktakuzës”, tha i akuzuari tjetër, Vladimir Toliq.
Mirëpo, sipas avokatit të familjes së Afrim Bunjaku, rasti Banjska nuk mbyllet me 45 të akuzuarit aktual, ku vetëm tre prej të cilëve janë të arretuar.
“Kam informacione që janë edhe shumë persona të tjerë të përfshirë, a do të ngritet edhe një aktakuzë apo do të zgjerohet kjo aktualja, mbetet në strategjinë e prokurorisë. Sidoqoftë, hetimet për këtë rast në mënyrë të vrullshme dhe intensive po vazhdojnë”, tha avokati i familjes Bunjaku, Arianit Koci.
Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë. Si rezultat i dhunës së përdorur u vra zyrtari policor Afrim Bunjaku.
Ndaj 43 personave të tjerë të përfshirë në rastin Banjska, me krye Milan Radoiçiq, Themelorja i është drejtuar Gjykatës Supreme, për t’i kërkuar opinion nëse ndaj tyre mund të aplikohet gjykimi në mungesë, për çka ende nuk ka një vendim.
