Si një 14 vjeçar, gjatë vitit 1999 kishte mbledhur fonde dhe rroba për qytetarët e Kosovës. Tani për herë të parë, profesori italian Andrea Caputo ka vendosur ta vizitojë vendin. Për t’u njoftuar më shumë për kontributin e tij dhe se si po e sheh tani Kosovën, ndjekim kronikën në vazhdim.
Për herë të parë për Kosovën kishte dëgjuar gjatë kohës së luftës.
E tani 25 vjet pas, erdhi ta vizitojë atë.
Profesori italian, Andrea Caputo, kishte kontribuar për qytetarët gjatë vitit 1999.
Në atë kohë, 14 vjeçar ai kishte mbledhur fonde dhe rroba për t’i dërguar në Kosovë.
“Për aq sa mbaj mend, në shkollën time ne po organizonim mbledhje fondesh dhe gjithashtu mblidhnim rroba. E mbaj mend që pastaj kanë ardhur edhe karabinierët që ishin pjesë e KFOR-it, për të marrë ato që ne po mblidhnim, për t’i sjellë pastaj në Kosovë për të ndihmuar njerëzit që po vuanin gjatë luftës”, tha Caputo.
E për Kosovën ka fjalë të mira.
Ndonëse do të qëndrojë për një periudhë të shkurtër, ai vlerëson atë çfarë vendi ofron.
“Mendoj se Kosova është një vend i bukur, ndihet si një vend i lulëzuar. Unë jam profesor i menaxhimit strategjik, andaj edhe nëse ecën rrugës e sheh se si vendi po zhvillohet mjaft shpejt”, tha ai.
Iniciativa e tij për të ndihmuar Kosovën gjatë luftës kishte filluar në kohën kur ishte në një shkollë katolike në Romë.
Aty u ishte dhënë një detyrë për luftërat që po ndodhnin në zonën afër tyre, e si rrjedhojë zgjedhja e Andreas kishte qenë Kosova.
E të shtunën, dëshirë e tij ishte që të shëtisë nëpër disa qytete të vendit.