Agjencia Botërore Anti-Doping (WADA) ka apeluar vendimin e Agjencisë Ndërkombëtare të Integritetit të tenisit (ITIA) në Gjykatën e Arbitrazhit Sportiv në Lozanë (CAS) dhe po kërkon pezullimin e tenistit numër një në botë aktualisht, Jannik Sinner.
Para fillimit të US Open në fund të gushtit, ITIA nuk ndëshkoi Sinnerin pasi tenisti italian në mars rezultoi në dy teste pozitiv për clostebol.
Closteboli është substancë e ndaluar për sportistët nga WADA. Sinneri e përdori clostebolin për ta trajtuar një prerje në gisht – por ajo mund të ketë efekt në rritje të performancës.
Të shtunën, WADA ka thënë se vendimi i ITIA-s nuk ishte i saktë sipas rregulloreve në fuqi.
“Ne do të kërkojmë pezullim nga një deri në dy vjet. WADA nuk dëshiron që t’ia heqë rezultatet e arritura Sinnerit”, thuhet në njoftim.
Sinner, pavarësisht presionit të shkaktuar nga skandali i dopingut, fitoi US Open, titullin e dytë Grand Slam, pas Australian Open në fillim të këtij viti.
