Ish-kryeministri i Kosovës, Avdullah Hoti ka thënë se Qeveria ka dështuar të mbajë premtimin për furnizim me energji të vazhdueshëm e me çmim të përballueshëm.
Ai ka thënë se Kosova nuk ka siguri energjetike dhe se çmimi i energjisë është rritur.
Hoti në një postim në Facebook pas vizitës që i ka bërë kryeministri Kurti bashkë me ministren Rizvanolli, ka thënë se në fund të mandatit do duhej të promovohej termocentrali me gaz dhe jo zyrtarët e qeverisë të mburren me remontin e blloqeve para dimrit.
“Në vitin e katërt të mandatit, do të duhej të promovohej termocentrali me gaz. Por, në vend të këtij projekti, Kryeministri e Ministrja e Ekonomisë vizitojnë KEK-un dhe krenohen me remontin e blloqeve në përgatitje për dimrin që po vjen. Kjo është për keqardhje. Pas katër vitesh në pushtet, asnjë projekt madhor nuk ka nisur. Nuk janë kryer as projektet e nisura nga qeveria e kaluar. Premtimi që VV-Guxo u kanë dhënë qytetarëve më 14 shkurt 2021 ka qenë: “Furnizim me energji të vazhdueshme dhe të përballueshme”. Ky premtim, sikurse të gjitha premtimet e tjera, është shkelur pasi kapacitetet energjetike nuk janë rritur. Sot, Kosova nuk ka siguri energjetike, pra nuk ka energji të vazhdueshme. Çmimi i energjisë është rritur dy herë në këtë mandat, por jo pagat dhe të ardhurat e tjera, duke e shkelur kështu premtimin për energji të përballueshme”, ka shkruar Hoti.
Kurti e Rizvanolli të martën kanë vizituar Termocentralin “Kosova B” të KEK-ut, në të cilin janë duke u bërë remontet në përgatitje për sezonin e dimrit.
