Kombëtarja e Shqipërisë po synon edhe fitoren e dytë në po aq ndeshje të luajtura në kampanjën e re të Ligës së Kombeve.
Pas fitores 2:1 ndaj Ukrainës, Shqipëria po kërkon triumfin edhe kundër Gjeorgjisë, me të cilën do të përballet në kuadër të xhiros së dytë të Grupit 1 të Ligës B të Ligës së Kombeve.
Dueli Shqipëri – Gjeorgji, luhet sot prej orës 20:45 në stadiumin “Air Albania” në Tiranë, i cili do të jetë i stërmbushur pasi ditë më parë janë shitur të gjitha biletat për këtë ndeshje.
Shqipëria, javën e shkuar triumfoi 2:1 ndaj Ukrainës në Pragë kurse Gjeorgjia fitoi 4:1 kundër Çekisë dhe të dyja kombëtaret i prijnë grupit me nga tri pikë.
Selektori i Shqipërisë, Sylvinho ka folur fjalë të mëdha për Gjeorgjinë në konferencën për shtyp, por tekniku brazilian ka insistuar se “kuqezinjtë” futen në fushë për fitore pasi do ta kenë edhe përkrahjen e madhe të publikut.
Krahas Sylvinhos, edhe mesfushori Kristjan Asllani që doli në konferencë, ka thënë se synimi i Shqipërisë në këtë përballje është fitorja dhe shkëputja në krye të grupit me 6 pikë pas dy ndeshjeve të luajtura në Ligën e Kombeve.
Shqipëria ka luajtur vetëm ndeshje miqësore me Gjeorgjinë prej vitit 2005 e tutje. Së fundmi, këto dy kombëtare u përballen në miqësoren e luajtur mars të vitit 2022, e cila përfundoi pa gola.
Si Shqipëria ashtu edhe Gjeorgjia, u paraqiten në Kampionatin Evropian “Gjermania 2024” të mbajtur muaj më parë.
Për dallim prej Shqipërisë që u eliminua në fazën e grupeve në “Euro 2024”, Gjeorgjia nuk avancoi përtej 1/8 së finales.
