Kombëtarja e Zvicrës nuk ka pasur start të mirë në kampanjën e re të Ligës së Kombeve.
Në dy ndeshjet e para të kësaj gare, Zvicra ka regjistruar dy humbje dhe këto rezultate janë shqetësuese për selektorin Murat Yakin.
Pas humbjes 2:0 nga Danimarka, Zvicra pësoi edhe nga Spanja me rezultatin e thellë 4:1, të dielën mbrëma.
Në duelin ndaj Spanjës, Zvicrës i mungoi kapiteni Granit Xhaka për shkak të suspendimit pasi në ndeshjen me Danimarkën u përjashtua nga loja pas dy kartonëve të verdhë.
Selektori Yakin, të hënën është shprehur se e ka pasur të vështirë ta zëvendësoj Xhakën dhe se mungesa e tij ndaj Spanjës është vërejtur shumë.
“Loja lojë bazohet në zotërimin e topit dhe nëse mungon Graniti, atëherë mungojnë lidhjet dhe zgjidhjet që ofron”, është shprehur ndër të tjera Yakin.
Zvicra është pjesë e Grupit D4 në Ligën A të Ligës së Kombeve dhe renditet e fundit pa pikë.
Muajin tjetër, Zvicra do të përballet me Serbinë në udhëtim dhe Danimarkën në shtëpi, në kuadër të xhiros së tretë dhe të katërt të Ligës së Kombeve.
