Luftëtari me prejardhje nga Velezha e Prizrenit, Gjoni Palokaj nuk ka të ndalur në MMA.
Palokaj ka arritur fitoren e radhës në kafaz, pasi triumfoi bindshëm ndaj garuesit nga Venecuela, Karol Arteaga.
Të shtrunën mbrëma, në Oberhausen të Gjermanisë para 10 mijë shikuesve në “Rudolf Arena Weber”, Palokaj regjistroi fitoren e radhës.
Edhe pse kundërshtari i tij, Arteaga kishte një rekord prej 6 fitoreve dhe vetëm 1 humbjeje, Palokaj dominoi tërësisht duke e fituar meçin bindshëm me pikë.
Për Palokajn që ka debutuar me sukses të madh në Oktagon, kjo është fitorja e katërt rresht.
Në total, Palokaj numëron 8 fitore deri më tani, ku 6 prej tyre i ka mbyllur para kohe.
Si zakonisht, Palokaj pas fitores ndaj kundërshtarit nga Venecuela, festoi me flamurin kombëtar, duke mos harruar edhe një herë rrënjët e tij.
Tani, Palokaj ka një synim tjetër pasi kërkon të ketë përballje me Pascal Hintze, meç ky që pritet të mbahet këtë vit në Munchen të Gjermanisë.
