Fusha e stadiumit Fadil Vokrri ka qenë në fokus sërish, një ditë para përballjes së parë të Kosovës, në edicionin e ri të Ligës së Kombeve.
Kombëtarja e Rumanisë është kundërshtari i Dardanëve, në ndeshjen e parë në kryeqytet pas gati një viti.
Terreni i ri është kritikuar fillimisht nga trajneri i Legias, kundështarit të Dritës, por pavarësisht reagimit të kreut të FFK-së, fusha e re në Fadil Vokrri, u përmend si e fortë dhe e papërshtatshme edhe nga selektori i Kosovës, Franko Foda dhe trajneri i ri i Rumanisë, Luqesku.
Në këtë terren zbarkojnë sonte nga ora 20:45, dy kombëtaret, që përveç rivalitetit në garën e re për kosovarët, është një motiv më shumë për ta mposhtur kombëtaren e Evropianit, që në Gjermani shkoj pas fitores kontraverse në kualifikime, ndaj Kosovës.
Më 12 shtator të vitit të kaluar në ndeshjen Rumani – Kosovë, tifozët vendës shpalosën pankartën me parullën në gjuhën serbe, Kosova është Serbi, duke bërë që ndeshja të ndërpritej për 40 minuta.
Vazhdimin e saj e shfytëzuan vendësit që realizuan dy gola për ta fituar ndeshjen dhe për ta bërë një hap pranë Euro 2024.
Nisur nga kjo Vedat Muriqi e Foda kanë thënë se duan të hakmerren në fushë, ndaj ekipit që është favoriti i grupit J, në Ligën C të Ligës së Kombeve. Pjesë e këtij grupi janë edhe Qipro e Lituania.
Kosova është përballë dy herë ndaj Rumanisë, duke pësuar një humbje e duke luajtur pa gola në Prishtinë.
Stadiumi “Fadil Vokrri” do të jetë i mbushur me tifozë të Kosovës, pasi nuk do të ketë tifozë nga Rumania, që do të jetë një arsye më shumë për ekipin dardan të kërkojë fitoren.
Kombëtarja jonë vjen nga një seri prej dy humbjeve rresht në miqësore dhe ka vetëm një fitore në pesë ndeshjet e fundit.
Megjithatë forma e mirë e futbollistëve të Kosovës, me skuadrat e tyre jep shpresë për një paraqitje e rezultat pozitiv ndaj një rivali të vështirë.
