Sulmuesit Taulant Seferi dhe Arbër Hoxha kanë folur në prag të dy ndeshjeve të këtij muaji që Kombëtarja e Shqipërisë i luan në kuadër të sezonit të ri të Ligës së Kombeve.
Të shtunën, Shqipëria përballet me Ukrainën në Pragë kurse tri ditë më vonë në stadiumin “Air Albania” në Tiranë e pret Gjeorgjinë.
Këto ndeshje i takojnë Grupit 1 të Ligës B të Ligës së Kombeve, të cilin e përbën edhe Kombëtarja e Çekisë.
Shqipëria, të hënën ka filluar zyrtarisht grumbullimin për këto dy përballje, të cilat sipas Seferit janë tejet të rëndësishme duke pasur parasysh synimet e “kuqezinjëve”.
Sipas tij, Shqipëria synon pikët maksimale në të dyja përballjet, por fokusi momental është te dueli me Ukrainën.
“Janë kundërshtarë shumë të fortë dhe duhet të përgatitemi mirë për të dhënë maksimumin. Objektivi kryesor i joni është që në çdo ndeshje të japim maksimumin dhe shpresojmë që në ndeshjen e parë të dalim fitimtarë, pastaj të nisim përgatitjet për ndeshjen me Gjeorgjinë”, ka thënë Seferi.
Edhe Hoxha ka vlerësuar lartë Ukrainën, por është optimist për një rezultat të favorshëm, i cili do ta motivonte Shqipërinë para duelit me Gjeorgjinë. Hoxha ka pranuar se kërkon fitore në të dyja ndeshjet, pasi Shqipëria synon të përfundoj e para në grup dhe të promovohet në Ligën A për sezonin tjetër.
“Duke marrë parasysh që është një mundësi shumë e mirë për Botërorin, pse mos të renditemi në vendin e parë. Kemi skuadra shumë të forta në grup, por ne do të japim maksimumin gjithmonë për Kombëtaren tonë”, shtoi Hoxha.
Të dy futbollistët kanë ftuar tifozët që të jenë në numër sa më të madh për ndeshjen në shtëpi me Gjeorgjinë.
Në ndeshjet e këtij muaji, Shqipërisë do t’i mungoj sulmuesi Armando Broja dhe kapiteni Berat Gjimshiti për shkak të lëndimeve.
