Pas vizitës së delegacionit të kryesuar nga Bob Dole në Prishtinë, amerikanët në fund të gushtit të vitit 1990, vazhduan për në Moskë ku morën pjesë në një konferencë botërore për të drejtat e njeriut. Por, këtu kishte ndodhur një ngjarje e pazakontë. Dikush ishte paraqitur, madje kishte mbajtur edhe fjalim në emër të përfaqësuesit kosovar, Gazmend Pulës. Ky i fundit për Tëvë1 ka zbuluar detajet e asaj që ndodhi 34 vjet më parë.
Më 29 gusht të vitit 1990, një delegacion i rëndësishëm arriti në Kosovë.
Gjashtë burrave amerikanë, po iu printe senatori Bob Dole.
Këta u takuan me delegacionin shqiptar në zyrat e “Hotel Grand”-it në Prishtinë.
E nga afër panë edhe dhunën që forcat serbe po ushtronin mbi shqiptarët.
E nga Prishtina, Bob Dole me amerikanët e tjerë u nisën për në Moskë.
Në kryeqytetin rus, do të merrnin pjesë në një konferencë botërore për të drejtat e njeriut.
E shqiptarët atje, u përfaqësuan nga kryetari i komitetit kosovar të Helsinkit, Gazmend Pula.
Por, një ngjarje e pazakontë, ndodhi pak minuta para se Pulës t’i vinte radha për të folur.
Këtij iu tha se ai tashmë e kishte kryer fjalimin.
“Me agjendë unë isha e paraparë me dal me thënë fjalën time, në konferencën botërore për të drejtat e njeriut në Moskë, ishte e caktuar me orë. Para asaj ore dola të takohesha më disa kolegë dhe kur u ktheva pas gjysmë ore. Kur më erdhi radha për të folur, më tha kryesuesi i sesionit, Z.Pula ju e keni kryer fjalimin tuaj. I thashë si e kam kryer, unë posa erdha? Thotë ishte personi i cili u prezantua si Gazmend Pula, kryetar i komitetit kosovar të Heslinkit, që e mbajti fjalimin”, ka thënë Pula.
Por, kush ishte personi që foli për gjendjen e kosovarëve, në këtë konferencë botërore?
“Figurë misterioze, sigurisht e deleguar nga shërbimet sekrete. Nuk e takova asnjëherë dhe nuk e dija as cili ishte, por kishte dalë e kishte llomotitur pa taksë pa pullë, gjera që nuk e përfaqësonin realitetin e kundër nga ai i hidhur kosovar”, deklaroi Pula
Por, Pula e dinte mirë se në çfarë situate po kalonin kosovarët nën regjimin serb.
Për këtë nuk u dorëzua.
Unë mandej pata rast dhe dola e dhashë tablonë të shkeljeve dhe represionit serb mbi popullin shqiptar për vetëvendosje, me dhunë nga të gjitha segmentet e dhunës që mund të aplikoj shteti (duke filluar) nga përzënia e të gjithë punëtorëve nga puna”, tha ai
Ndryshe, Gazmend Pula ishte pjesë edhe e delegacionit kosovar të kryesuar nga ish-presidenti, Ibrahim Rugova, që në Prishtinë u takua me delegacionin amerikan.
