Mesfushori i Ballkanit, Queven Da Silva Inacio është shpallur lojtari më i mirë i javës së parë në Superligën e Kosovës në futboll.
FFK-ja, ka njoftuar të hënën se Inacio e ka fituar çmimin “Ylli i Javës” pas paraqitjes fantastike që e pati në ndeshjen e parë të Ballkanit në Superligë.
Ballkani, të dielën triumfoi 2:0 në Suharekë ndaj Dukagjinit kurse më i merituari për këtë fitore ishte pikërisht mesfushori brazilian.
Ai shënoi të dy golat në këtë ndeshje, në të cilën u aktivizua për 70-të minuta dhe kjo ka bërë që Komisioni i Veteranëve të futbollit ta përzgjedh pikërisht mesfushorin Queven si më të mirin.
Pasi ka pranuar çmimin, Queven është shprehur tejet i lumtur për vlerësimin dhe ka thënë se do të jap gjithçka nga vetja për ta ndihmuar Ballkanin që të mbroj titullin e kampionit.
“Po punojmë shumë për të arritur qëllimin tonë. Kemi ligën që ka nisur dje dhe qëllimi ynë është të bëhemi sërish kampionë. Jam shumë i lumtur që jam këtu dhe përfaqësoj Ballkanin, këtë ekip të madh që ka një peshë të madhe në futbollin e Kosovës. Do të luftojmë deri në fund dhe do të punojmë gjithmonë për të qenë në majë”, ka thënë Queven ndër të tjera për faqen zyrtare të FFK-së.
