Ministrja e Drejtësisë, Albulena Haxhiu ka reaguar për vdekjen e M.Y, e cila ka ndërruar jetë pasi bashkëshorti i saj e kishte rrahur duke i shkaktuar lëndime të rënda.
Haxhiu është shprehur e tronditur me rastin, teksa ka thënë se rastet e dhunës dhe vrasjet e grave janë realitet i frikshëm dhe i papranueshem, shkruan teve1.info
“Rastet e dhunës dhe vrasjet e grave janë realiteti i frikshëm dhe i papranueshëm dhe po angazhohemi në vazhdimësi që të ngrisim vetëdijen shoqërore me qëllim të parandalimit të rasteve të dhunës dhe femicidit dhe që dhunuesit dhe vrasësit e grave të marrin dënimet maksima”, ka shkruar Haxhiu.
Tutje ajo ka thënë se është e nevojshme që institucionet përgjegjëse të angazhohen për një sistem që garanton se rastet e dhunës të trajtohen me seriozitetin e merituar.
“Është e nevojshme që institucionet përgjegjëse të angazhohen për një sistem që garanton që çdo rast i dhunës trajtohet me seriozitetin e merituar dhe mbajtjen e dhunuesve e vrasësve përgjegjës”, ka shkruar Haxhiu.
Ndryshe, sot një grua me inicialet M.Zh., nga Gushterica e Poshtme e Komunës së Graçanicës, ka ndërruar jetë sot në Qendrën Spitalore Klinike në Prishtinë, pasi burri i saj e kishte rrahur duke i shkaktuar lëndime të rënda.
Kështu ka bërë të ditur për teve1.info drejtori i Qendrës Emergjente në Prishtinë, Naser Syla.
“Fatkeqësisht, ajo ka ndërruar jetë mëngjesin e sotëm. Ajo kishte një hemorragji në tru nga lëndimet e rënda, dhe ne nuk mundëm ta operonim në atë gjendje. Ajo ishte në makineri 24 orë në ditë”, tha Syla.
M.Zh., ishte pranuar në gjendje të rëndë mbrëmjen e 31 korrikut.
