Kampioni i Kosovës në futboll, Ballkani nuk ka opsion tjetër veç fitores për të avancuar në raundin e tretë kualifikues të Ligës së Konferencës.
Në mbrëmje, prej orës 20:00, Ballkani luan në Maltë me kampionin e këtij vendi, Hamrun Spartans ndeshjen e kthimit që do të zhvillohet në stadiumin “Tony Bezzina”.
Kjo është ndeshja e kthimit e raundit të dytë kualifikues të Ligës së Konferencës, pasi në të parën, të luajtur javën e shkuar në Podujevë, rezultati ishte 0:0.
Ballkani mund të kualifikohet në raundin tjetër kualifikues të kësaj gare vetëm me fitore dhe ekipi i trajnerit Ilir Daja do të bëjë të pamundurën për ta eliminuar kundërshtarin e tij.
Në ndeshjen e parë, Ballkani ishte dukshëm më i mirë se Hamrun Spartans por i mungoi finalizimi pasi dominoi tërësisht dhe krijoi raste të shumta shënimi.
Në Maltë, Ballkani ka udhëtuar me misionin e vetëm, të mbetet pjesë e garave evropiane dhe të synoj për herën e tretë rresht kualifikimin në fazën e grupeve të Ligës së Konferencës.
Sigurisht, Ballkani llogaritet favorit përball Hamrun Spartans, por kampioni i Maltës do ta ketë edhe përkrahjen e publikut vendas në këtë ndeshje të rëndësishme për të dyja skuadrat.
Skuadra nga Suhareka nuk ka pasur start të mirë këtë sezon në arenën ndërkombëtare, pasi u eliminua në raundin e parë kualifikues të Ligës së Kampionëve nga Santa Coloma e Andorrës.
Kështu që, Ballkani është i vendosur për t’u kualifikuar në raundin e tretë dhe për ta bërë një gjë të tillë, ekipi kosovar patjetër që i duhet fitorja këtë mbrëmje në Maltë.
