Skuadra e Dritës po synon ta konfirmoj avancimin në raundin e tretë kualifikues të Ligës së Konferencës, sot pasdite.
Skuadra nga Gjilani prej orës 17:00 e luan ndeshjen e kthimit kundër Breidablikut të Islandës në stadiumin “Zahir Pajaziti” në Podujevë.
Duelin e parë të luajtur javën e shkuar në Islandë, Drita e fitoi me rezultatin 2:1 dhe për të avancuar tutje, i mjafton edhe barazimi ndaj Bredablikut.
Sigurisht, Drita llogaritet favorite për ta fituar edhe ndeshjen e dytë pasi në të parën tregoi lojë më të mirë se kundërshtari dhe dominoi pothuajse gjatë tërë takimit.
Kualifikimi në raundin e tretë kualifikues të Ligës së Konferencës për Dritën, do të ishte një hap i rëndësishëm drejt fazës së grupeve të kësaj gare.
Drita prej sezonit 2018/19 paraqitet në garat evropiane dhe vetëm një herë ka arritur në rrethin e tretë kualifikues të garave të UEFA-s.
Në sezonin 2020/21, u pat eliminuar në raundin e tretë të Ligës së Evropës nga Legia VArshava kurse në garat evropiane vazhdimisht është përballur me kundërshtar të fortë.
Këtë sezon, Drita aventurën evropiane e nisi prej raundit të dytë kualifikues të Ligës së Konferencës dhe në ndeshjen e parë arriti ta mposht Breidablikun në udhëtim.
Tani, Dritës i mbetet që edhe në ndeshjen e dytë të tregoj forcën e saj për ta konfirmuar vendin në një raund më të lartë të garave të UEFA-s, saktësisht kualifikimeve të Ligës së Konferencës.
