Prokuroria Themelore në Gjilan ka kërkuar masën e paraburgimit ndaj të pandehurve L.C dhe E.R, të cilët dyshohen se kanë kryer veprën penale “rrëmbim”.
Në njoftimin e Prokurorisë thuhet se të dy e kanë ndihmuar një person tjetër, i cili është në arrati, ta rrëmbente një të mitur në mënyrë që ta detyronin vëllanë e të miturit të kryente transport të substancës narkotike në Beograd.
“Sipas kërkesës, ekziston dyshimi i bazuar se të pandehurit L.C. dhe E.R., më 20 Korrik 2024, në komunën e Gjilanit, me qëllim të përfitimit material, kanë ndihmuar të pandehurin e tretë, i cili gjendet në arrati, në kryerjen e veprës penale të rrëmbimit, në atë mënyrë që me veturë e kanë transportuar të njëjtin së bashku me të dëmtuarin e mitur nga komuna e Preshevës, nëpër lokacione të ndryshme, edhe pse kanë qenë në dijeni se i mituri ishte rrëmbyer nga i pandehuri i tretë, të cilin e kanë mbajtur të mbyllur në veturë, me qëllim që mos ta dorëzojnë gjersa vëllai i tij të kryente obligimin për transportim të substancës narkotike, për në Beograd”, ka njoftuar Prokuroria./teve1.info/
