Në 24 vjetorin e vrasjes së veprimtarit, Shaban Manaj atë e ka përkujtuar Kryetari i Lidhjes Demokratike, Lumir Abdixhiku.
Abdixhiku ka thënë se Manaj u vra në Kosovën e filleve të lirisë.
“23 korriku i vitit 2000 u bë datë e kobshme nga lajmi se veprimtari, luftëtari i palodhur i çështjes kombëtare, avokati i shquar Shaban Manaj, u vra në Kosovën e filleve të lirisë,”ka shkruar ai në Facebook.
Më tej ai ka vlerësuar punën e veprimtarit krah Presidentit Rugova si dhe kontributin e dhënë për shtetin e Kosovës deri në çlirimin e saj.
“Si një personalitet i rrallë që dha kontribut për shtetin e Kosovës deri në çlirim, Manaj punoi pa ndalur krah Presidentit Rugova, duke mbetur në histori për veprimtarinë e tij të paharrueshme ndërgjenerata”,tha Abdixhiku.
“Edhe pas 24 viteve, dhimbja mbetet e njëjtë për familjen Manaj, Lidhjen Demokratike dhe gjithë bashkëpunëtorët e Shaban Manajt pa zbardhjen e motivit dhe rrethanave të vrasjes së tij, si dhe dënimin e atyre që kryen këtë akt barbar,” ka përfunduar kryetari i LDK-së.
