Është paralajmëruar kontrolli i Integritetit të gjyqtarëve dhe prokurorëve.
Mirëpo, edhe zyrtarët që do ta kryjnë këtë kontroll, do të kontrollohen nga zyrtarë të tjerë.
Me plotësim ndryshimet e ligjeve për KPK dhe KGjK, zyrtarët që do të bëjnë kontrollin e integritetit të gjyqtarëve dhe prokurorëve, do të kontrollohen nga Policia e Kosovës.
Kjo risi, vlerësohet nga Insituti i Kosovës për Drejtësi se shkel Kushtetutën dhe përbën rrezik për politizim të vlerësimit.
“Lënia në mandat të Policisë së Kosovës të kontrollit të zyrtarëve të Njësisë për Kontrollimin e Integritetit, paraqet sipas IKD-së një shkelje kushtetuese për arsye se, neni 128 i Kushtetutës së Republikës së Kosovës, që flet për fushëveprimtarinë, ku ndër të tjera thotë se Policia mban përgjegjësi për ruajtjen e rendit dhe sigurinë publike në tërë territorin e Kosovës. Pra, sipas Kushtetutës këto janë dy fushat e vetme mbi të cilat policia e Kosovës ka mandate”, ka thënë Melos Kolshi nga IKD.
Si problematike në fazën e konsultimeve publike, po shihet afati kohor.
Komentet për shtatë projektligje, sipas IKD-së janë kufizuar nga afati kohor prej pesëmbëdhjetë ditësh.
“Kur publiku kishte pesëmbëdhjetë ditë pune afat për të dhënë komente për gjithsej shtatë projektligje, Ministria e Drejtësisë nuk shqyrtoi mundësinë e zgjatjes së afatit për komente, siç e përcakton rregullorja. Zgjatja e afatit siç e lejon rregullorja do të ndihmonte në përmirësimin e transparencës dhe përfshirjen më të madhe të palëve të interesuara dhe individët, që dëshirojnë të japin kontributin e tyre. Një afat kaq i shkurtër, mund të përceptohet si tendencë për minimizimin e kritikave dhe shpejtimin e procedurave për miratimin e ligjeve”, tha Ariana Rexha.
Këto dhe përplasjet e herë pas hershme, mes Këshillave dhe Ministrisë së Drejtësisë, po konsiderohet se shpërfaqin mosgatishmërinë e këtyre institucioneve për reforma në drejtësi.
“Kemi parë në vazhdimësi kritika publike nga ana e politikës ndaj KGJK-së dhe KPK-së, kemi parë “një luftë” në distancë mes këtyre mekanizmave. Kjo fatkeqsisht e ulë besimin e publikut dhe e ulë besimin se këta institucione me të vërtetë kanë interes të përbashkët për ta adresuar reformën në drejtësi”, tha Ehat Miftaraj.
Në gjetjet e IKD-së, thuhet se ndryshimi në projektligj që përcakton Mbikëqyrjen e Akademisë së Drejtësisë nga Komisioni për Legjislacion, është polizitim i institucionit dhe ndërhyrje e ekzekutivit në një institucin të pavarur.
