Granit Xhaka është plotësisht i gatshëm për përballjen me Kombëtaren e Anglisë, ndeshje të cilën Zvicra e luan në kuadër të fazës çerekfinale të “Euro 2024”.
Si kapiten, Xhaka pritet të jetë lider i Zvicrës edhe në këtë ndeshje, ku synon ta eliminoj Anglinë për të prekur gjysmëfinalen me “helvetikët”.
Përkundër dyshimeve për paraqitjen e tij në këtë ndeshje shkaku i lëndimit muskulor, Xhaka do të jetë gati dhe do të regjistroj ndeshjen e tij të pestë në këtë Evropian, ku në dy raste është shpallur lojtari më i mirë i takimit.
Xhaka ka thënë se e njeh mirë Anglinë pasi për disa sezone ka luajtur në Premier League me Arsenalin, ndërsa ka shtuar se ka besim të madh në fitoren e Zvicrës.
“Krahasuar me kombëtaret tjera, Anglia ka shumë lojtarë që luajnë në ligën e saj. Kjo e bën atë të veçantë, pasi kam luajtur kundër shumë prej tyre disa herë gjatë kohës sime në Premier League. Në thelb, për mua, megjithatë, është një lojë e fazës si çdo tjetër. Ne kemi besim dhe do të fokusohemi në pikat tona të forta, pavarësisht se kush është kundërshtari”, është shprehur Xhaka.
Ndeshja ndërmjet Anglisë dhe Zvicrës, luhet të shtunën prej orës 18:00.
